Երեք երկիր ներկայացնող հինգ հայազգի բռնցքամարտիկներ դուրս են եկել Բռնցքամարտի եվրոպական առաջնության եզրափակիչ և ապահովել են, նվազագույնը, արծաթե մեդալներ, ուրբաթ «Նովոստի-Արմենիա» գործակալությանը տեղեկացրեցին Ռուսաստանի հայերի «Երկրամաս» թերթի տեղեկատվական կենտրոնից։
Մինչև 48 կգ քաշային կարգում Հովհաննես Դանիելյանի (Հայաստան) մրցակիցը կլինի իսպանացի Խոսե դե լա Նիևե Լինարեսը։ Մինչև 57 կգ քաշային կարգում Արայիկ Համբարձումյանը (Ռուսաստան) եզրափակչում կհանդիպի ուկրաինացի Վասիլի Լոմաչենկոյի հետ։ Մինչև 60 կգ քաշային կարգում Վազգեն Սաֆարյանցը (Բելառուս) ռինգ դուրս կգա ռուս Լեոնիդ Կոստիլյովի դեմ։ Մինչև 64 կգ քաշային կարգում Էդուարդ Համբարձումյանը (Հայաստան) կմենամարտի hունգարացի Գյուլ Կատեի հետ։ Մինչև 91 կգ քաշային կարգում Հայաստանը ներկայացնող Ցոլակ Անանիկյանը ռինգ դուրս կգա Եգոր Մեխոնցևի (Ռուսաստան) դեմ։-0-
