Թենիսիստ Դավիթ Նալբանդյանը ՀՀ դեսպանից կացության հատուկ կարգավիճակի անձնագիր ստացավ

Արգենտինայում ՀՀ դեսպան Վլադիմիր Կարմիրշալյանը արգենտինացի հանրահայտ հայազգի թենիսիստ Դավիթ Նալբանդյանին կացության հատուկ կարգավիճակի անձնագիր է շնորհել, «Նովոստի-Արմենիա» գործակալությանը հայտնեցին հայկական ԱԳՆ մամուլի ծառայությունից։  

Արարողությունը կայացել է անցած երկուշաբթի Բուենոս Այրեսում Հայաստանի դեսպանատանը տեղի ունեցած ընդունելության ժամանակ։ Ներկայում հանրահայտ մարզիկը գտնվում է Երևանում, ուր նա ժամանել է չորեքշաբթի արգենտինացի ձեռնարկատեր, «Կորպորասիոն Ամերիկա» ընկերության սեփականատեր Էդուարդո Էռնեկյանի հրավերով, որը մի շարք տնտեսական նախագծեր է իրականցնում Հայաստանում։

Ընդունելության ժամանակ Կարմիրշալյանը նորանոր հաջողություններ մաղթեց հայազգի մարզիկին, որը թենիսիստների համաշխարհային դասակարգման ցուցակում ներկայում զբաղեցնում է յոթերորդ հորիզոնականը: Իր հերթին Նալբանդյանն իր երախտագիտությունը հայտնեց Հայաստանի իշխանություններին՝ տեղեկացնելով, որ պատմական հայրենիք կատարած այցի ընթացքում մտադիր է վարպետության դասընթաց անկացնել հայ թենիսիստների համար:

Ընդունելությանը ներկա էին Բուենոս Այրեսի սպորտի փոխնախարար Ֆրանսիսկո Իրարասավալը, Բուենոս Այրեսի քաղաքի խորհրդարանի տնտեսական զարգացման հանձնաժողովի նախագահ Անդրեա Մախյանը,  Բուենոս Այրես նահանգի Խորհրդարանի պատգամավորների պալատի անդամ Սերխիո Նահապետյանը, Բուենոս Այրես նահանգի անվտանգության նախկին նախարար Լեոն Կարլոս Արսլանյանը, ազգային բարերարներ Էդուարդո Սեֆերյանը, Արմեն Էքսերջյանը, Արմեն Մեծատուրյանը, Արգենտինայում մեծ համբավ վայելող նշանավոր բժիշկ-վարակաբան Դանիել Ստամբուլյանը, ճանաչված քաղաքական գործիչ և տնտեսագետ Կարլոս Մելքոնյանը, արգենտինահայ համայնքի այլ նշանավոր դեմքեր, համայնքային կառույցների ղեկավարներ: Ներկաների թվում էին նաև արգենտինյան խոշորագույն «Կլարին», «Նասիոն» և «Օլե» օրաթերթերի լրագրողները:

26-ամյա Նալբանդյանը Արգենտինայի թենիսի հավաքականի առաջատարն է և այժմ թենիսիստների համաշխարհային դասակարգման ցուցակում զբաղեցնում է յոթերորդ հորիզոնականը։ Նալբանդյանը թենիսով սկսել է զբաղվել 5 տարեկանից մի կորտում, որը սարքել էր իր հայ պապիկը։ Մարզիկի երակներում նաև գերմանացու արյուն է հոսում։ --0--