Շաբաթ օրը Կիրիլովը հատակին կհայտնվի. Դարչինյան

ԵՐԵՎԱՆ, 1 օգոստոսի. /Նովոստի-Արմենիա/.  Մինչև 52,2 կգ քաշային կարգում IBF տարբերակով աշխարհի չեմպիոնի տիտղոսի հավակնորդ Վիկ (Վախթանգ) Դարչինյանը հայտարարել է, որ օգոստոսի 2-ին ԱՄՆ-ում կայանալիք մենամարտում նոկաուտի կենթարկի չեմպիոնի գոտի ունեցող ռուս Դմիտրի Կիրիլովին, հայտնում է ՌԻԱ Նովոստին՝ հղում տալով FightNews.com կայքին։

«Կիրիլովը երբեք նոկդաունի չի ենթարկվել։ Դե ինչ, շաբաթ օրը նա կիմանա, թե դա ինչ է,- հայտարարել է Դարչինյանը, ով պրոֆեսիոնալ ռինգում իր 29 հաղթանակներից 23-ը ժամկետից շուտ է նվաճել,- Ժողովուրդը գալիս է բռնցքամարտի նոկաուտներ տեսնելու համար։ Հենց դրա համար էլ ես այստեղ եմ եկել։ Ֆրեդի Ռոուչը (Կիրիլովի ամերիկացի մարզիչը) հայտարարել է, որ ես կանխատեսելի եմ։ Դե ուրեմն, թող կանխատեսի, որ ես նոկաուտի կենթարկեմ իր տղային»։   

Տվյալ պահին բռնցքամարտի աշխարհի միակ ռուս չեմպիոն Դմիտրի Կիրիլովի մարտն ավելի թեթևքաշային կարգում աշխարհի նախկին չեմպիոն հայազգի Վիկ Դարչինյանի հետ, ով ներկայացնում է Ավստրալիան, կկայանա շաբաթ օրը, օգոստոսի 2-ին Սիեթլի մոտակայքում գտնվող Տակոմա (ԱՄՆ) քաղաքում։   

29-ամյա Դմիտրի Կիրիլովը IBF չեմպիոնի տիտղոսը նվաճել է անցած տարվա հոկտեմբերին՝ Մոսկվայում հաղթելով ամերիկացի Խոսե Նավառոյին։ Այս տարվա փետրվարին Կիրիլովը ոչ-ոքի ավարտեց մեքսիկացի Սեսիլիո Սանտեսի հետ մենամարտը և պահպանեց տիտղոսը։  

32-ամյա Վիկ (Վախթանգ) Դարչինյանը 2004-2007 թթ.-ին IBF տիտղոսակիրն էր ամենաթեթև քաշային կարգում։ Ֆիլիպինցի Նոնիտո Դոներայի կողմից նոկաուտով անսպասելիորեն պարտություն կրելուց հետո նա հաջորդ քաշային կարգ անցավ, որտեղ տիտղոսային մենամարտի իրավունք վաստակեց։ --0--