Մոսկվայում կայացած Աշխարհի գավաթի խաղարկության ժամանակ հայ ձյուդոյիստը նվաճել է ոսկե մեդալ

Հայ մարզիկ Արմեն Նազարյանը 66 կգ քաշային կարգում նվաճել է ոսկե մեդալ՝ Ձյուդոյի աշխարհի գավաթի խաղարկության ժամանակ, որը կայացել է մայիսի 23-24-ը՝ Մոսկվայում, «Նովոստի-Արմենիա» գործակալությանը տեղեկացրեցին Հայաստանի ձյուդոյի ֆեդերացիայից։

 «Բացի Նազարյանից, երկու հայ ձյուդոյիստներ իրենց քաշային կարգերում զբաղեցրել են յոթերորդ տեղերը. դրանք են Արթուր Սրափյանը (60 կգ) և Անուշ Հակոբյանը (52 կգ)», - ասաց գործակալության զրուցակիցը։

Միջազգային առաջնությանը Հայաստանը ներկայացնում էին հինգ մարզիկներ՝ Հովհաննես Դավթյանը (60 կգ), Արթուր Սրափյանը (60 կգ), Արմեն Նազարյանը (66 կգ), Հակոբ Առաքելյանը (90 կգ) և Անուշ Հակոբյանը (52 կգ)։

Բացի մարզիկներից, հայկական պատվիրակության կազմում էին Հայաստանի ձյուդոյի ֆեդերացիայի նախագահ Ալեքսան Ավետիսյանը և երկու մարզիչներ՝ Գագիկ Աղամալյանն ու Արթուր Գևորգյանը։ Հայ ձյուդոյիստները շարունակում են մնալ Մոսկվայում, որտեղ մասնակցում են մարզական հավաքում։-0-