Երևանում տեղի կունենա Fed Cup թենիսի կանանց թիմային առաջնությունը

ԵՐԵՎԱՆ, 21 օգոստոսի./Նովոստի-Արմենիա/. Fed Cup կանանց թենիսի ոչ պաշտոնական թիմային առաջնությունը Երևանում կանցկացվի ապրիլի 22-27-ը՝ Եվրոաֆրիկյան տարածաշրջանի երրորդ ենթախմբում, երկուշաբթի հաղորդեց հանրապետության թենիսի ֆեդերացիայի նախագահ Հարություն Փամբուկյանը։

«Հայ մարզասերների համար առաջնության այս մի քանի օրերը իսկական տոն կլինեն»,- ասաց Փամբուկյանը՝ լրագրողներին, Երևանում։

Միաժամանակ, նա նշեց, որ նման կարգի առաջնություն Հայաստանում առաջին անգամ է տեղի ունենալու։

Փամբուկյանի խոսքով, Թենիսի միջազգային ֆեդերացիայի որոշմամբ Երևանը դարձել է կանանց առաջնության անցկացման վայր։

Ֆեդերացիայի նախագահն ավելացրեց, որ վերջին երկու տարիների ընթացքում Հայաստանի հավաքականը չի մասնակցել Fed Cup առաջնությանը, քանի որ չուներ նման մակարդակի սպորտսմեններ։ «Այս տարի մեզ մոտ արդեն ձևավորվել է լուրջ թիմ, ունենք անգամ պահեստային խաղացողներ»,- ասաց Փամբուկյանը։

Իր հերթին, առաջնության գլխավոր դատավոր իտալացի Ռոբերտո Ռանիերին նշեց պատրաստվածության բարձր մակարդակի, ինչպես նաև առաջնությունն անցկացնելու համար անհրաժեշտ պայմանների ապահովման մասին։

Նա ներկայացրեց առաջնության որոշ տեխնիկական մանրամասներ։ Ռանիերիի խոսքով, յուրաքանչյուր թիմ կանցկացնի երկուական անհատական հանդիպում և մեկ հանդիպում՝ զույգերով։

«Մրցաշարի ավարտից հետո լավագույն երկու թիմերը դուրս կգան Եվրոաֆրիկյան տարածաշրջանի երկրորդ ենթախմբի խաղերին մասնակցելու»,- ավելացրեց նա։

Առաջիկա առաջնությունում ելույթ կունենան 11 երկրների հավաքականներ, այդ թվում՝ Հայաստանի, Իսլանդիայի, Նովեգիայի, Ֆինլանդիայի, Եգիպտոսի, Մարոկոյի, Լատվիայի, Մոլդովայի, Չերնոգորիայի, Զիմբաբվեի և Մավրիկիոսի հավաքականները։

Հայաստանը առաջնությունում ներկայացնելու են Լյուդմիլա Նիկոյանը, Աննա Մովսիսյանը և Տաթևիկ Եդիգարյանը։ Հայաստանի թիմի ավագը Գայանե Մովսիսյանն է։--0—