Լևոն Արոնյանը մեծ առավելությամբ պահպանում է առաջատարի իր դիրքերը «Ամբեր-2008» շախմատի մրցաշարում

Հայ գրոսմայստեր Լևոն Արոնյանը մոտ գտնվող մրցակցից 2,5 միավոր առավելությամբ վստահորեն պահպանում է առաջատարի իր դիրքերը Նիցցայում (Ֆրանսիա) անցկացվող «Ամբեր-2008» շախմատի միջազգային 17-րդ մրցաշարի ավարտից երկու փուլ առաջ։

Ինչպես չորեքշաբթի «Նովոստի-Արմենիա» գործակալությանը տեղեկացրեցին Հայաստանի շախմատի ֆեդերացիայից, նախօրեին տեղի ունեցած իններորդ փուլում Արոնյանը 2։0 հաշվով «կույր» և «արագ» հանդիպումների ժամանակ հաղթանակ է տարել ռուս Ալեքսանրդ Մորոզևիչի նկատմամբ։

Արդյունքում՝ հանդիպումների ինը օրերից հետո 12,5 միավորով մրցաշարային աղյուսակը գլխավորում է հայ գրոսմայստերը՝ 2,5 միավորով առաջ անցնելով մոտ գտնվող մրցակիցներից՝ ռուս Վլադիմիր Կրամնիկից, հունգարացի Պետեր Լեկոյից և նորվեգացի Մագնուս Կառլսենից։

9,5-ական միավորով 5-6 տեղերը կիսում են բուլղարացի Վեսելին Տոպալովը և ուկրաինացի Վասիլի Իվանչուկը, նվազագույն տարբերությամբ նրանց է հետևում աշխարհի չեմպիոն Վիշվանաթան Անանդը (Հնդկաստան)։

8,5 միավորով ութերորդ տեղում է Մորոզևիչը, 8 միավորով իններորդ տեղում է Սերգեյ Կարյակինը (Ուկրաինա), այնուհետև 7,5 և 7 միավորներով նրանց են հետևում Լյուկ Վան Վելինը (Հոլանդիա) և Բորիս Գելֆանդը (Իսրայել), իսկ 6,5 միավորով մրցաշարային աղյուսակը եզրափակում է ադրբեջանցի Շահրիար Մամեդյարովը։

Ամբեր-2008» 17-րդ միջագային շախմատի մրցաշարն անցկացվում է Նիցցայում (Ֆրանսիա)՝ 2008 թ. մարտի 15-27-ը՝ երկու շրջանով։

Յուրաքանչյուր փուլում հեղինակավոր առաջնության մասնակիցները ունենում են մեկական հանդիպում՝ մեկ «արագ» և մեկ «կույր»՝ կարճացված վերահսկմամբ (25 րոպե + 10 վայրկյան արված յուրաքանչյուր քայլի համար)՝ խաղաքարերի տարբեր գույներով յուրաքանչյուր փուլում անցկացնելով երկու հանդիպում։

Ընդհանուր մրցանակային ֆոնդը կազմում է 216 հազ. եվրո։-0-