ԵՐԵՎԱՆ, 25 դեկտեմբերի./Նովոստի-Արմենիա/. 2007թ. ընթացքում տարբեր միջազգային մրցումների և առաջնությունների ժամանակ հայ մարզիկները տարել են 104 ոսկե, արծաթե և բրոնզե մեդալներ։ Այս մասին երեքշաբթի Երևանում, լրագրողներին հայտարարեց ՀՀ սպորտի և երիտասարդության հարցերով նախարար Արմեն Գրիգորյանը՝ ամփոփելով անցնող տարվա արդյունքները։
«Հայաստանի մարզիկները մասնակցել են աշխարհի և Եվրոպայի 78 առաջնությունների, ինչպես նաև տարբեր մակարդակի 114 միջազգային մրցումների»,- հաղորդեց նա։
Գրիգորյանի գնահատականով, իր գլխավորած գերատեսչությունը հաջողությամբ է իրականացրել 2007թ. բոլոր ծրագրերը՝ հատուկ ուշադրության արժանացնելով մեր երկրում մանկապատանեկան սպորտի զարգացմանը։ Այսպիսով, այս ոլորտում նախարարությունը անցկացրել է ավելի քան 150 տարբեր միջոցառում։
«2007թ. ընթացքում նախարարությանը հաջողվել է կատարել իր առջև դրված բոլոր խնդիրները։ Այդ թվում՝ իրականացվել է բնակչության շրջանում առողջ ապրելակերպի քարոզման ծրագիրը, ինչպես նաև կատարվել է մարզիկների պատրաստումը՝ միջազգային մրցումներին մասնակցելու նպատակով»,- ասաց նա։
Նախարարի խոսքով, հաշվետու տարում նախարարությունը իրականացրել է մի շարք լայնամասշտաբ միջոցառումներ, որոնց թվում՝ «Լավագույն մարզական ընտանիք» մրցույթը։
«Տարեց տարի այս միջոցառմանը մասնակցող ընտանիքների թիվն ավելանում է, ինչը վկայում է մարզական կյանքի հանդեպ աճող հետաքրքրության մասին»,- ասաց նա, ավելացնելով, որ 2007թ. այս ակցիայի մասնակից-ընտանիքների թիվը հասել է 105-ի։
Բացի այդ, ավանդական է դարձել նաև դպրոցական սպարտակիադաների անցկացումը։ «Մարզական միջոցառումների անցկացման գծով միջազգային չափորոշիչները կանոնավոր կերպով փոխվում են, և մենք չպետք է հետ մնանք այդ միտումից»,- ասաց Գրիգորյանը։
Նախարարը նաև տեղեկացրեց, որ անցնող տարվա ընթացքում ՀՀ պետբյուջեի միջոցներով վերանորոգվել են 59 մարզական շինություն, մասնավորապես, սպորտային դահլիճներ, արենաներ, սպորտային բակեր, ինչպես նաև երկու հրաձգարան։
Գրիգորյանի կարծիքով, 2007թ. ձեռքբերումներից մեկը դարձավ Հայաստանում ուինդսերֆինգի կենրտոնի բացումը՝ Սևանա լճի ափին։
Միաժամանակ, նախարարն ավելացրեց, որ անցնող տարվա ընթացքում նախարարությունն ահռելի աշխատանք է կատարել, սակայն, «առջևում դեռ շատ գործ կա»։--0—
