Երևանում շահագործման է հանձնվել Օլիմպիական ռեզերվի մանկա-պատանեկան սպորտդպրոցի շենքը

ԵՐԵՎԱՆ, 28 սեպտեմբերի./Նովոստի-Արմենիա/.Երևանում ուրբաթ շահագործման է հանձնվել Օլիմպիական ռեզերվի մանկա-պատանեկան սպորտդպրոցի շինությունը։

Ինչպես լրագրողներին հայտնեց դպրոցի տնօրեն, նախկինում միջազգային կարգի բռնցքամարտիկ և մարզիչ Սուրեն Ղազարյանը, շենքի վերակառուցումն իրականացվել է մոսկվացի բարեգործ Լևոն Հարությունյանի միջոցներով՝ 350 հազ. ԱՄՆ դոլարի չափով։

Նրա խոսքերով, վերակառուցումից հետո դպրոցում բռնցքամարտիկների արդյունավետ մարզման համար ստեղծվել են բոլոր անհրաժեշտ պայմանները։ «Դպրոցը հիմնվել է 1959-ին Եվրոպայի եռակի չեմպիոն, օլիմպիական չեմպիոն Վլադիմիր Ենգիբարյանի պատվին, բայց այդ ժամանակվանից շենքը չի վերանորոգվել»,-նկատեց Ղազարյանը։

Իր հերթին, Հայաստանի ազգային օլիմպիական կոմիտեի (ԱՕԿ) նախագահ Գագիկ Ծառուկյանը Լևոն Հարությունյանին շնորհեց հայկական ԱՕԿ-ի շքանշանը։

«Ես ուրախ եմ, որ կան նման մարդիկ, ովքեր ոչինչ չեն ափսոսում սեփական ժողովրդի բարեկեցության համար»,-ասաց Ծառուկյանը՝ դպրոցի աշակերտներին կոչ անելով ժրաջանորեն մարզվել և միջազգային մրցույթներում ցույց տալ լավ արդյունքներ։

«Ձեզ համար ստեղծվել են բոլոր պայմանները, և դուք պետք է ամեն ինչ անեք, որպեսզի շարունակեք հայկական բռնցքամարտի ավանդույթները, որոնց հիմնադիրն է Վլադիմիր Ենգիբարյանը»,-նշեց ԱՕԿ-ի նախագահը։--0--