Հայաստանի կառավարությունը 12 մլն. դրամ է հատկացրել Երևանում պատանիների շախմատի աշխարհի առաջնությունն անցկացնելու համար

Հայաստանի կառավարությունը 12 մլն. դրամ է հատկացրել (շուրջ 35,2 հազ. ԱՄՆ դոլար) Երևանում հոկտեմբերի 2-17-ը Պատանիների շախմատի աշխարհի առաջնության կազմակերպման համար։ Այս մասին հինգշաբթի կառավարական ճեպազրույցում տեղեկացրեց Հայաստանի երիտասարդության հարցերի և սպորտի նախարար Արմեն Գրիգորյանը։

«Շախմատի համաշխարհային ֆեդերացիայի որոշմամբ (ՖԻԴԵ) մինչև 20 տարեկան պատանիների շախմատի աշխարհի առաջնությունը տեղի կունենա Երևանում հոկտեմբերի 2-17-ը։ Դա մեծ միջոցառում է և Հայաստանի համար մեծ պատիվ»,-ասաց նա։

Գրիգորյանը նկատեց, որ Հայաստանն ունի  շախմատային լավ ավանդույթներ, և հենց այդ պատճառով ՖԻԴԵ-ն որոշեց առաջնությունն անցկացնել Երևանում։

Նա տեղեկացրեց, որ ներկայումս  ընդունվում են պատանիների աշխարհի առաջնությանը մասնակցելու հայտերը։ Դրանք արդեն ներկայացրել են 40 երկրներ։--0—