Հայաստանը հայտ է ներկայացրել Բաքվում կայանալիք ըմբշամարտի աշխարհի առաջնությանը մասնակցելու համար

ԵՐԵՎԱՆ, 6 սեպտեմբերի./Նովոստի-Արմենիա/. Հայաստանը հայտ է ներկայացրել Բաքվում կայանալիք ըմբշամարտի աշխարհի առաջնությանը մասնակցելու համար, որը տեղի կունենա սեպտեմբերի 17-23 Բաքվում, «Նովոստի-Արմենիային» հայտնեց ՀՀ սպորտի և երիտասարդության հարցերի նախարարության օլիմպիական մարզաձևերի վարչության պետ, ՀՀ ըմբշամարտի ֆեդերացիայի գլխավոր քարտուղար Լևոն Վարդանյանը։

«Մեկ ու կես ամիս առաջ, և գրեթե հենց նախօրեին մենք հայտ ուղարկեցինք Ըմբշամարտի միջազգային ֆեդերացիային՝ FILA»,- ասաց Վարդանյանը, մեկնաբանելով հինգշաբթի ադրբեջանական ԶԼՄ-ների տարածած այն տեղեկատվությունը, թե իբր Հայաստանի ըմբշամարտի ֆեդերացիան Բաքվում կայանալիք աշխարհի առաջնությանը մասնակցելու հայտ չի ներկայացրել։

Վարդանյանն ընդգծեց, որ FILA պետք է տեղյակ պահեր ադրբեջանական կողմին, որ Հայաստանը մտադիր է մասնակցել աշխարհի առաջնությանը։

«Այսօր մենք մտադիր ենք կապ հաստատել Ըմբշամարտի միջազգային ֆեդերացիայի հետ՝ իրավիճակը պարզաբանելու համար»,- ասաց նա։

Ըստ ադրբեջանական ԶԼՄ-ների, առաջնության կազմկոմիտեի անդամ, Ադրբեջանի օլիմպիական ազգային կոմիտեի փոխնախագահ Խազար Իսաևը հայտարարել է, որ հայ մարզիկների ազգանունները բացակայում են 99 երկրներից մասնակցող մարզիկների ցուցակից, որոնք Բաքու են ուղարկել ըմբշամարտի աշխարհի առաջնության մասնակցության նախնական հայտերը։

Իսաևը հայտարարել է, որ եթե հայ մարզիկները Բաքու չժամանեն մինչև սեպտեմբերի 16-ը, երբ սկսվելու է կշռման գործընթացը, ապա նրանց թույլ չի տրվի մասնակցել աշխարհի առաջնությանը։ --0—