ԵՐԵՎԱՆ, 21 մայիսի. /Նովոստի–Արմենիա/. Լոնդոնի «Արսենալ»–ի կիսապաշտպան, Հայաստանի ազգային հավաքականի ավագ Հենրիխ Մխիթարյանը չի մասնակցի Եվրոպա լիգայի` «Չելսի»–ի հետ եզրափակիչ խաղին, որն անցկացվելու է Բաքվում։ Այդ մասին հայտարարությունը տեղադրվել է «Արսենալ»–ի պաշտոնական կայքում։
Մայիսի 29–ին Բաքվում կկայանա Եվրոպա լիգայի եզրափակիչ խաղն «Արսենալ»–ի և «Չելսի»–ի միջև։
««Արսենալ»–ը մանրակրկիտ ուսումնասիրել է Մխիթարյանի մասնակցության տարբերակներն առաջիկա խաղին, ֆուտբոլիստի և նրա ընտանիքի հետ հարցի քննարկումից հետո որոշվել է, որ նա չի մեկնի Բաքու»,– ասվում է ակումբի կայքում։
Նշվում է, որ «Արսենալ»–ը նամակ է գրել ՈՒԵՖԱ–ին և խորը մտահոգություն է հայտնում իրավիճակի վերաբերյալ։ «Հենրիխը մեր ակումբի առանցքային խաղացողներից է, այդ իսկ պատճառով դա մեծ կորուստ է։ Շատ տխուր իրավիճակ է, քանի որ ֆուտբոլիստի կարիերայում եզրափակիչներ հազվադեպ են լինում»,– ասվում է «Արսենալ»–ի հայտարարությունում։
Ինքը` Մխիթարյանը, մեկնաբանել է իրավիճակն իր Facebook-ում։
«Դիտարկելով բոլոր ընթացիկ տարբերակները` մենք ստիպված եղանք բարդ որոշում կայացնել, որ ես թիմի հետ չմեկնեմ Եվրոպա լիգայի եզրափակչին»,– նշել է ֆուտբոլիստը։
Նա հայտնել է, որ այս մակարդակի խաղերն այդքան էլ հաճախ չեն լինում ֆուտբոլիստների կյանքում։ «Պետք է խոստովանեմ, որ շատ ցավալի է ինձ բաց թողնել այս խաղը։ Երկրպագելու եմ իմ թիմակիցներին։ Եկեք այս (գավաթը) տուն բերենք»,– գրել է Մխիթարյանը։
Загружается новость ... "Лево"
ՀՀ ԱԳՆ–ն հայկական արմատներով երկրպագուների` Ադրբեջան մտնելու արգելքը ռասիզմ է անվանել։
Ավելի վաղ Մեծ Բրիտանիայում Ադրբեջանի դեսպան Թաիր Տագիզադեն խոստացել էր երաշխավորել «Արսենալ»–ի հայ կիսապաշտպան Հենրիխ Մխիթարյանի անվտանգությունը Բաքվում գտնվելու ընթացքում։ -0-