Մխիթարյան. Բունդեսլիգայում չեմպիոնության համար պայքարում ամեն ինչ կորած չէ

ԵՐԵՎԱՆ, 29 դեկտեմբերի. /Նովոստի–Արմենիա/. Հայաստանի ֆուտբոլի հավաքականի և Դորտմունդի «Բորուսիայի» կիսապաշտպան Հենրիխ Մխիթարյանը կարծում է, որ գերմանական Բունդեսլիգայում չեմպիոնության հարցը դեռ լուծված չէ։

«Միշտ դժվար է մրցակցել «Բավարիա»–ի պես ուժեղ ակումբի հետ։ Իհարկե, մակարդակի տարբերություն կա, բայց մենք ուզում ենք հնարավորինս մոտիկ լինել Բավարիային, դա կարևոր է ինչպես խաղացողների, այնպես էլ ընդհանուր առմամբ թիմի համար»,– ասել է Մխիթարյանը «Նովոստի–Արմենիա» գործակալությանը տված հարցազրույցում։

Ըստ նրա, «Բորուսիային» այս խաղաշրջանում հաջողվում է հասնել Մյունխենի ակումբին։

«Ճիշտ է, տարբերությունը կազմում է ութ միավոր, բայց ոչինչ կորած չէ։ Կփորձենք շարունակել նույն ոգով, քանի որ առջևում առաջնության երկրորդ մասն է, և մենք կանենք ամեն ինչ, որ հնարավորինս բարձր տեղ զբաղեցնենք առաջնությունում»,– ասել է Մխիթարյանը։

Գերմանական Բունդեսլիգայի ընթացիկ մրցաշրջանում «Բորուսիան» 38 միավորով զբաղեցնում է երկրորդ հորիզոնականը` 17 փուլերից հետո հետ մնալով Մյունխենի «Բավարիայից» 8 միավորով։

Մխիթարյանի հետ հարցազրույցի ամբողջ տեքստն ընթերցեք այստեղ։ -0-