Մարիա Շարապովան հայտնվել է Roland Garros մրցաշարի մասնակիցների ցուցակում

ԵՐԵՎԱՆ, 13 ապրիլի. /Նովոստի–Արմենիա/. Ռուս թենիսիստուհի Մարիա Շարապովան, ում դոպինգ նմուշում այս տարվա սկզբին հայտնաբերվել էր արգելված մելդոնիում, ընդգրկվել է 2016 թվականի մայիսի 16—ից հունիսի 5–ը Փարիզում անցկացվելիք «Մեծ սաղավարտի» չորս մրցաշարերից մեկի` Roland Garros մրցաշարի հայտում։

Շարապովայի ազգանունը մրցաշարի մասնակիցների ցուցակում է, որը հրապարակվել է մրցումների պաշտոնական կայքում, գրում է РБК–ն։

Իր դոպինգ նմուշի դրական արդյունքների մասին Շարապովան հայտարարել էր մարտի 7–ին։ Մարտի 12–ից նրան հեռացրել էին մրցումներից, իսկ Թենիսի միջազգային ֆեդերացիան (ITF) դատավարություն է սկսել մարզիկի նկատմամբ։

Ապրիլի 13–ին Համաշխարհային հակադոպինգային գործակալությունը (WADA) ճշտել է մարզիկների արյան մեջ մելդոնիումի թույլատրելի պարունակությունը։ Այսպես, եթե դոպինգ նմուշը վերցրել են մինչև 2016 թվականի մարտը, և արգելված նյութի պարունակությունը չի գերազանցում 1 մկգ–ն 1 մլ արդյան մեջ, ապա դա թույլատրելի ցուցանիշ է։ Իսկ եթե նմուշը վերցրել են մարտի 1–ից հետո, և մելդոնիումի խտությունը գերազանցում է 1 մկգ–ն, կամ եթե նմուշը վերցրել են մինչև մարտի 1–ը, և մելդոնիումի պարունակությունն արյան մեջ կազմել է 1–ից 15 մկգ, ապա օրինախախտ մարզիկի որոկազրկման մասին որոշում պետք է կայացնի ֆեդերացիան։

Դրանից հետո Ռուսաստանի թենիսի ֆեդերացիայի նախագահ Շամիլ Տարպիշչևը նշել է, որ Շարապովան կարող է ներում ստանալ և մասնակցել Ռիո դե Ժանեիրոյի Օլիմպիական խաղերին, որոնք կկայանան 2016 թվականի օգոստոսին։ -0-