Լևոն Արոնյանը կմասնակցի շախմատային թագի հավակնորդների մրցաշարին

ԵՐԵՎԱՆ, 5 նոյեմբերի. /Նովոստի–Արմենիա/. Հայ շախմատիստ Լևոն Արոնյանը կմասնակցի շախմատային թագի հավակնորդների մրցաշարին, որը կանցկացվի 2016 թվականի մարտին Մոսկվայում։

Ինչպես հայտնում է Շախմատի միջազգային ֆեդերացիայի պաշտոնական կայքը (FIDE), այս մասին նախօրեին Հայաստանի նախագահ և հանրապետության շախմատի ֆեդերացիայի նախագահ Սերժ Սարգսյանին Երևանում հայտնել է FIDE ղեկավար Կիրսան Իլյումժինովը։

Ըստ նրա, Արոնյանը կազմակերպիչների առաջարկած նոմինանտ է դարձել` միանալով մյուս հավակնորդներին` Խիկարա Նակամուրային, Ֆաբիանո Կարուանային (ԱՄՆ), Սերգեյ Կարյակինին, Պյոտր Սվիդլերին (Ռուսաստան), Վեսելին Տոպալովին (Բուլղարիա), Անիշ Գիրիին (Նիդեռլանդներ), Վիշվանաթան Անանդին (Հնդկաստան)։

Իլյումժինովը հայտնել է, որ մրցաշարի կազմակերպիչներն են լինելու` ՖԻԴԵ–ն և «Ագոն» ընկերությունը։ Այն կանցկացվի Ռուսաստանի շախմատի ֆեդերացիայի օժանդակությամբ։ Որպես գործընկեր հանդես կգա ռուսաստանաբնակ հայ գործարար Սամվել Կարապետյանին պատկանող «Տաշիր» ընկերությունների խումբը։


Հավակնորդների մրցաշարի հաղթողը 2016 թվականին խաղ կանցկացնի աշխարհի գործող չեմպիոն նորվեգացի Մագնուս Կարլսենի հետ։

Լևոն Արոնյանը հայ ուժեղագույն շախմատիստ է, 2005 թվականի շախմատի աշխարհի առաջնության գավաթակիր, Շախմատային երեք օլիմպիադաների (2006, 2008,  2012 թթ.), Լինարեսի (2006) և Վեյկ ան Զեեի սուպերմրցաշարերի (2007, 2008, 2012 և 2014), ՖԻԴԵ 2008/2009 Գրան պրիի, Բիլբաոյի Մեծ սաղավարտի (2009, 2013), «Ամբերի» (2008, 2009, 2011), 2009 թվականի արագ շախմատի աշխարհի մրցաշարի հաղթող է, Ֆիշերի շախմատի աշխարհի մրցաշարի երկակի չեմպիոն է (2008, 2009), բլիցի աշխարհի չեմպիոն (2010)։ Շախմատի աշխարհի ութերորդ թիմային առաջնության հաղթող Հայաստանի կազմում 2011 թվականին։ -0-