ԵՐԵՎԱՆ, 31 հոկտեմբերի./Նովոստի–Արմենիա/. Արտաշատի մարզադաշտը կարող է վերակառուցվել միջազգային չափանիշներին համապատասխան` թեթև աթլետիկայի մրցաշարեր անցկացնելու նպատակով, հայտնեց կրթության, գիտության, մշակույթի և սպորտի նախարար Արայիկ Հարությունյանը 2020 թվականի պետբյուջեի նախագծի քննարկումների ընթացքում։
«Նոյեմբերի 2–ին Արտաշատում ես կծանոթանամ տեղի մարզադաշտի վիճակին և խորհրդակցություն կունենամ քաղաքի համայնքապետի հետ` դրա վերակազմավորման ծրագրի իրագործման հնարավորությունների վերաբերյալ»,– ասաց նա։
Նրա խոսքով, միջազգային դոնորները համաձայնություն են տվել Հայաստանում թեթև աթլետիկայի միջազգային մակարդակի մրցաշարեր անցկացնելու նախաձեռնությանը և պատրաստ են խոշոր ներդրումների։
Նախարարն ընդգծեց, որ Արտաշատի մարզադաշտը հարմար է նաև Երևանին մոտ լինելու պատճառով, ինչը չի դժվարացնի այնտեղ այցելելը, ինչպես նաև նոր ազդակ կհաղորդի մայրաքաղաքում և Արարատի մարզում թեթև աթլետիկայի զարգացմանը։
Загружается новость ... "Лево"
«Լուսավոր Հայաստան» խմբակցության պատգամավոր Արմեն Եղիազարյանն իր հերթին ասաց, որ Թեթև աթլետիկայի ֆեդերացիայից ստացված տեղեկության համաձայն, ներդրումային ծրագիրը կարող է արժենալ շուրջ 1 մլն դոլար։
«Հայաստանում չկան թեթև աթլետիկայի համար նախատեսված միջազգային չափանիշի մարզադաշտեր։ Գրեթե բոլոր մարզադաշտերը նախատեսված են ֆուտբոլի համար, սակայն միջազգային դոնորները պատրաստ են ներդրումներ կատարել աթլետիկայի մարզաձևերի համար վազքուղիների և դաշտերի ստեղծման և զինման ոլորտում»,– ասաց նա։ -0-