ՀԱՂԹԱՆԱԿ․ հայ բռնցքամարտիկ Հովհաննես Բաչկովը Տոկիո-2020-ում ջախջախեց ադրբեջանցուն և դուրս եկավ 1/4 եզրափակիչ (ՖՈՏՈ)
ԵՐԵՎԱՆ, 31 հուլիսի․/Նովոստի-Արմենիա/․ Բռնցքամարտիկ Հովհաննես Բաչկովը Տոկիոյում ընթացող 32-րդ ամառային Օլիմպիական խաղերի 1/4 եզրափակիչ փուլի ուղեգիր է նվաճել, հաղորդում է ՀՀ ԿԳՄՍՆ-ն։
Մինչև 63 կգ քաշային կարգի 1/8 եզրափակչում Բաչկովը մենամարտել է ադրբեջանցի Ջավիդ Չալաբիևի հետ և հաղթել 4։1 հաշվով։
Օգոստոսի 3-ին կայանալիք 1/4 եզրափակչում Եվրոպայի կրկնակի չեմպիոնը մրցելու է Էլնուր Աբդուրաիմովի հետ (Ուզբեկստան), որին հաղթելու դեպքում կապահովի Օլիմպիական խաղերի առնվազն բրոնզե մեդալ։
Ինչպես նշում է Հայաստանի օլիմպիական կոմիտեն, առաջին ռաունդից հետո, երբ կողային մրցավարները նախապատվությունը տվեցին ադրբեջանցուն, Հովհաննեսը դրանից զայրացավ ու ռինգում, երկրորդ ռաունդից սկսեց անել աներևակայելին:
Իր ցնցող հարվածներին առավել ուժգնություն հաղորդելու նպատակով ազերի մրցակցին ասես հարվածում էր աջ և ձախ ուսագոտիներով, ասել է թե՝ միայն չէր հարվածում ոտքերով: Այդքանով հանդերձ մեր վարպետը մրցակցին գերազանցեց կարգապահությամբ, ազնիվ պայքարում հաղթեց ու մտավ քառորդ եզրափակիչ փուլ:
Լավ է, որ պատվասեր գյումրեցին հաղթեց և ապացուցեց իր բարձր կարգը: Այս պարագայում գլխավորն այն է, որ նա դրսևորեց հիրավի անկոտրում կամք, ու նաև այն , որ ինքը իսկական արժանապատիվ հայ տղամարդ է:-0-
