Ուժեղագույն շախմատիստները կներկայացնեն Հայաստանն Իսլանդիայում մեկնարկող Եվրոպայի թիմային առաջնությունում

ԵՐԵՎԱՆ, 10 նոյեմբերի. /Նովոստի–Արմենիա/. Հայաստանի ուժեղագույն շախմատիստներն ու շախմատիստուհիները կմասնակցեն նոյեմբերի 12–ին Իսլանդիայի մայրաքաղաքում մեկնարկող Եվրոպայի 2015 թ.–ի թիմային առաջնությունում։

Առաջնության պաշտոնական կայքում հրապարակված տվյալների համաձայն` տղամարդկանց մրցաշարում հայկական շախմատային դպրոցի պատիվը կպաշտպանեն գրոսմայստերներ Լևոն Արոնյանը, Գաբրիել Սարգսյանը, Սերգեյ Մովսեսյանը, Հրանտ Մելքումյանն ու Կարեն. Գ. Գրիգորյանը։

Լևոն Արոնյանը կմասնակցի շախմատային թագի հավակնորդների մրցաշարին>>

Հայաստանի տղամարդկանց հավաքականը Շախմատային օլիմպիադայի եռակի հաղթող է (2006 թ.–ին` Թուրինում, 2008 թ.–ին` Դրեզդենում և 2012 թ.–ին` Ստամբուլում)։

Կանանց մրցաշարում Հայաստանի թիմում ներառվել են գրոսմայստերներ Էլինա Դանիելյանը, Լիլիթ Մկրտչյանը և Մարիա Կուրսովան, ինչպես նաև Լիլիթ Գալոյանը (միջազգային կարգի վարպետ) և Սուսաննա Գաբոյանը։

Տղամարդկանց և կանանց մրցաշարներն անցկացվում են նոյեմբերի 12–22–ը շվեյցարական համակարգով, 9 տուրով։ Բոլոր թիմերը բաղկացած են 4 հիմնական խաղացողներից և մեկ պահեստային խաղացողից։ Առաջնությանը մասնակցում են եվրոպական 30 երկրներ ներկայացնող շուրջ 300 շախմատիստներ։–0–