«Սպարտակը» համաձայնել է Արաս Օզբիլիսին 3.5 միլիոնով վաճառել թուրքական «Բեշիկթաշին»

ԵՐԵՎԱՆ, 12 նոյեմբերի. /Նովոստի–Արմենիա/. Մոսկվայի «Սպարտակի» և  Հայաստանի հավաքականի կիսապաշտպան Արաս Օզբիլիսը բանակցում է Ստամբուլի «Բեշիկթաշ» տեղափոխության վերաբերյալ,  հայտնում է Fotomac-ը:

Կողմերի միջև բանակցությունների առաջին փուլն անցել է Մոսկվայում՝ «Սպարտակի»  և  «Լոկոմոտիվի» միջև Ռուսաստանի առաջնության 14-րդ տուրի խաղից առաջ: Նշվում է, որ 2 ակումբներն արդեն հստակեցրել են 25-ամյա Օզբիլիսի տրանսֆերային արժեքը, որը կկազմի 3.5 միլիոն եվրո:

Ավելի վաղ ռուսական մամուլում լուրեր էին շրջանառվում, որ «Սպարտակը» մտադիր է այս ձմռանը տրանսֆերի հանել հիմնական կազմի մի քանի ֆուտբոլիստների, այդ թվում՝ Արաս Օզբիլիսին և  Հայաստանի հավաքականի հարձակվող Յուրա Մովսիսյանին:

Արաս Օզբիլիսը 2013-ին Կրասնոդարի «Կուբանից» է տեղափոխվել մոսկովյան ակումբ: Թուրքիայի առաջնության 11-րդ տուրից հետո «Բեշիկթաշն» առաջատարն է եւ 2 միավոր գերազանցում է երկրորդ տեղում ընթացող «Ֆեներբահչեին»:-0-