Մխիթարյանը մտածում է ադրբեջանական «Գաբալայի» հետ պատասխան հանդիպման մասին

ԵՐԵՎԱՆ, 4 նոյեմբերի. /Նովոստի–Արմենիա/. Հայաստանի հավաքականի և Դուրտմունդի  «Բուրուսիայի» կիսապաշտպան Հենրիխ Մխիթարյանը հայտարարել է, որ մտածում է ադրբեջանական  «Գաբալայի» հետ պատասխան հանդիպման մասին:

Հայաստանի ֆուտբոլի ազգային հավաքականի և Դորտմունդի «Բորուսիա» ակումբի կիսապաշտպան Հենրիխ Մխիթարյանը, ելնելով անվտանգության նկատառումներից, հոկտեմբերի 22-ին հրաժարվել էր մեկնել Բաքու` Եվրոպայի Լիգայի շրջանակում «Գաբալա» ակումբի հետ հանդիպմանը մասնակցելու համար:

Ավելի վաղ Ադրբեջանի արտաքին գործերի նախարարությունը հայտարարություն էր տարածել, որում հասկացրել էր, թե չի խոչընդոտի Մխիթարյանի ժամանմանն Ադրբեջանի մայրաքաղաք, իսկ դրանից առաջ ՈՒԵՖԱ-ի գլխավոր քարտուղար Ջանի Ինֆանտինոն հայտարարել էր, որ Ֆուտբոլի եվրոպական ասոցիացիաների միությունը կօժանդակի հայ ֆուտբոլիստին, եթե նա խնդիրներ ունենա Եվրոպայի լիգայի խաղին մեկնելու հարցում: Ադրբեջանական ԶԼՄ-ների տվյալներով, Բաքուն Մխիթարյանին ընդգրկել է «սև ցուցակում» Լեռնային Ղարաբաղի Հանրապետություն այցելելու համար:

«Շատերը կարծում են, դա ճիշտ որոշում էր, իսկ որոշները դեռևս այն կարծիքին են, որ ես թիմի հետ պետք է մեկնեի Բաքու և խաղայի այնտեղ: Բայց ես կարծում եմ, որ ճիշտ որոշում էր այստեղ մնալը»,-նշել է Մխիթարյանը:

Նա ավելացրել էր, որ կուզենար խոսել այդ խաղի մասին, քանի որ արդեն այն
անցյալում է:

«Ես  արդեն մտածում եմ  ադրբեջանական  «Գաբալայի» հետ պատասխան հանդիպման մասին, որն առաջիկայում անցկացվելու է այստեղ: Հուսով եմ, որ այն սովորական խաղ կլինի, քանի որ ես ոչ ոքի ոչինչ չունեմ ապացուցելու»,-ասել է ֆուտբոլիստը:

«Մենք միասին ենք որոշում ընդունել։ Եթե սա կիսաեզրափակիչ լիներ, հնարավոր է, այլ որոշում ընդունեինք։ Սա բոլորիս համար լավագույն որոշումն է։ Զրուցել ենք Մխիթարյանի հետ և եկել այն եզրակացության, որ բոլորիս համար ավելի լավ կլինի, եթե նա բաց թողնի առաջիկա հանդիպումը», – Բաքու մեկնելուց առաջ օդանավակայանում ասել էր  գերմանական ակումբի տնօրեն Հանց–Յոախիմ Վատցկեն։-0-