ԵՐԵՎԱՆ, 10 փետրվարի. /Նովոստի–Արմենիա/. Հունահռոմեական ըմբշամարտի Հայաստանի հավաքականի գլխավոր մարզիչ Լևոն Ջուլֆալակյանը ՀԸՖ-ի մամուլի ծառայության հետ զրույցում պարզաբանել է մարտի 8-13 Լատվիայի մայրաքաղաք Ռիգայում կանալիք Եվրոպայի առաջնությանը մասնակցելու համար հայտավորած կազմի ընտրությունը:
Հիշեցնենք, որ մասնակիցների թվում բացակայում է Արսեն Ջուլֆալակյանը:
«Այս տարվա Եվրոպայի առաջնությանը, ինչպես եղել է վերջին տարիներին, կմասնակցենք ամբողջական կազմով, սակայն նախորդ տարիների համեմատ որոշ փոփոխություններ կլինեն:
Մասնավորապես, առաջին անգամ աշխարհամասի գլխավոր ստուգատեսում Հայաստանը 66 կգ քաշային կարգում կներկայացնի Միհրան Հարությունյանը: Եվրոպայի առաջնությունում իր նորամուտը կնշեն նաև երիտասարդների աշխարհի չեմպիոններ Կարապետ Չալյանը (75 կգ), 80 կգ քաշային Ռաֆիկ Մանուկյանը և աշխարհի երիտասարդական առաջնության բրոնզե մեդալակիր, գերծանր քաշային Էդգար Խաչատրյանը: Իսկ Արսեն Ջուլֆալակյանը Եվրոպայի առաջնությանը չի մասնակցի, քանի որ նպատակաուղված պատրաստվում է օլիմպիական վարկանիշային մրցաշարերին»,- ասել է Լևոն Ջուլֆալակյանը:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
