ԵՐԵՎԱՆ, 10 դեկտեմբերի. /Նովոստի–Արմենիա/. Հայաստանի ֆուտբոլի հավաքականի գլխավոր մարզչի պաշտոնը պետք է վստահել միջազգային մեծ փորձով օտարերկրացի բարձրակարգ մասնագետի, կարծում է մարզական մեկնաբան Մենուա Մեհրաբյանը։
Հինգշաբթի Հայաստանի ֆուտբոլի ֆեդերացիայի գործադիր կոմիտեն ազգային հավաքականի գլխավոր մարզիչ է նշանակել Երևանի «Արարատի» 59–ամյա մարզիչ Վարուժան Սուքիասյանին։
«Երկրի հավաքականը մարտարվեստների ուսուցման պլացդարմ չէ։ Այստեղ տեղ չունեն ամենամյա կամ եռամսյակային փորձերը, դրան պետք է շատ լուրջ մոտենալ։ Հայկական ֆուտբոլի նկատմամբ այդպիսի վերաբերմունքն անթույլատրելի է»,– ասաց Մեհրաբյանը «Նովոստի–Արմենիա» գործակալությանը տված հարցազրույցում։
Ըստ նրա, երկրի հավաքականի առջև ԱԱ-2018–ի եզրափակիչ անցնելու խնդիր է դրված, նույնիսկ եթե ոչ Ֆեդերացիայի ղեկավարության կողմից։
Հայաստանի ֆուտբոլի գլխավոր մարզիչ է նշանակվել Վարուժան Սուքիասյանը>>
«Դա են պահանջում երկրպագուները, ովքեր, ամենայն հավանականությամբ, ամենից շատ են դա ցանկանում և շահագրգռված են դրանով։ Հայաստանի ֆուտբոլի ֆեդերացիան կատարել է իր ընտրությունը։ Մենք լավ ենք հիշում այն ամենը, ինչ կատարվում էր գլխավոր մարզչի պաշտոնի հետ ԱԱ-2016–ի ընտրական փուլում, և մենք բոլորս տեսանք, թե ինչ դրանից ստացվեց։ Անձամբ ես չեմ ցանկանում, որ այս անգամ էլ այդպիսի խոշոր սխալներ լինեն»,– ասաց փորձագետը։
«Տա Աստված, որ Վարուժան Սուքիասյանի մոտ ամեն ինչ լավ ստացվի, թեև դժվար եմ դրան հավատում։ Անկասկած, Սուքիասյանը մեր ֆուտբոլի ամենափորձառու մասնագետներից է և վայելում է Հայաստանի ֆուտբոլային աշխարհի հարգանքը։ Կցանկանայի, որ այդ հարգանքը կրկնապատկվի ԱԱ ընտրական փուլից հետո։ Շնորհավորում եմ Վարուժան Սուքիասյանին, պտղաբեր աշխատանք եմ մաղթում։ Հայաստանի հավաքականը, որպես թիմ, որն ապացուցել է, որ շատ բանի է ընդունակ, սխալվելու իրավունք չունի»,– ավելացրեց նա։ -0-