Երևանը պատրաստվում է հյուրընկալել Ծանրամարտի Եվրոպայի առաջնությունը. կազմակերպման համար հատկացվել է ավելի քան 2,4մլն դոլար

ԵՐԵՎԱՆ, 6 հոկտեմբերի./Նովոստի–Արմենիա/. ՀՀ կառավարությունը հաստատել է հաջորդ տարի Երևանում անցկացվելիք ծանրամարտի մեծահասակների Եվրոպայի առաջնության կազմակերպման ծրագիրը, որի ընդհանուր արժեքն է 990 մլն դրամ (ավելի քան 2,4մլն դոլար)։

Առաջնությունն անցկացվելու է 2023թ.–ի ապրիլի 15–23–ը։

Ի կատարումն ՀՀ վարչապետի աշխատակազմի ղեկավար Արայիկ Հարությունյանի մոտ 2022 թվականի հուլիսի 7-ին կայացած՝ 2023 թվականի ապրիլին Երևանում կայանալիք ծանրամարտի Եվրոպայի առաջնության կազմակերպման և անցկացման նախապատրաստական աշխատանքների համակարգող հանձնաժողովի նիստի արձանագրության, որի համաձայն Հայաստանի ծանրամատի ֆեդերացիային է հատկացվել 600.540.5 հազար դրամ գույք ձեռք բերման նպատակով, իսկ միջոցառման իրականացման ծառայությունների համար հատկացվելու է 990.140.2 հազ. ՀՀ դրամ:

Առաջնության ընթացքում ակնկալվում է շուրջ 350 մարզիկների մասնակցություն, ինչպես նաև նրանց ուղեկցող անձնակազմի և այլ պատվիրակների մասնակցություն, 45 մրցավար և միջոցառումը սպասարկող անձնակազմ (նախնական`30 հոգի): Ընդհանուր առմամբ ակնկալվում է շուրջ 500 անձանց մասնակցություն:–0–