Հաջորդ տարի Հայաստանում կհայտնվի ֆուտբոլի կանանց հավաքական. ՀՖՖ

ԵՐԵՎԱՆ, 4 հունիսի./Նովոստի–Արմենիա/. Հաջորդ տարվա հունվարից Հայաստանում կսկսի ձևավորվել ֆուտբոլի կանանց հավաքական, երեքշաբթի ասուլիսի ժամանակ տեղեկացրեց Հայաստանի ֆուտբոլի ֆեդերացիայի կանանց ֆուտբոլի բաժնի պետ Աննա Թադևոսյանը։

«Այս պահին Հայաստանում գործում է մինչև 19 տարեկանների աղջիկների հավաքական, որը պատրաստվում է Բոսնիա և Հերցեգովինայում կայանալիք առաջնությանը, իսկ այս տարվա սեպտեմբերից կձևավորվի մինչև 17 տարեկանների հավաքական, որը կմասնակցի ՈւԵՖԱ–ի հովանու ներքո անցկացվող մրցաշարերին» – նշեց Թադևոսյանը։ 

ՀՖՖ Ազգային հավաքների համակարգող և մեթոդաբանության ղեկավար Ռուբեն Լեզկանն իր հերթին նշեց, որ կարծրատիպերի դեմ աշխատանքում շատ կարևոր է իրականացնել կրթական ծրագրեր։ 

«Հայաստանի խնդիրն այն է, որ ֆուտբոլը համարվում է տղամարդու աշխարհ։ Մենք փորձում ենք լուծել խնդիրն` առաջին հերթին շեշտը դնելով կրթության վրա։ Մենք աշխատում ենք անմիջապես կանանց հետ, ովքեր գալիս են հատուկ դասախոսությունների», – նշեց Լեզկանը։–0–