ԵՐԵՎԱՆ, 20 մարտի. /Նովոստի–Արմենիա/. Գրոսմայստեր Լևոն Արոնյանը երեքշաբթի ուժերը չափում է ադրբեջանցի Շահրիար Մամեդյարովի հետ Բեռլինում անցկացվող Հավակնորդների մրցաշարի 9–րդ տուրի շրջանակում։
Արոնյանը խաղում է սպիտակ խաղաքարերով։ Պարտիան մեկնարկել է Երևանի ժամանակով ժամը 18։00–ին։
Առաջին երկու տուրերում Արոնյանը ոչ–ոքի է խաղացել չինացի Դին Լիժենի և ադրբեջանցի Շահրիյար Մամեդյարովի հետ, իսկ երրորդում` պարտվել է աշխարհի նախկին չեմպիոն Վլադիմիր Կրամնիկին։ Չորրորդ տուրում սև խաղաքարերով Լևոն Արոնյանը հաղթանակ է տարել Սերգեյ Կարյակինի նկատմամբ։ Հինգերորդ տուրում Արոնյան–Գրիշչուկ հանդիպումն ավարտվել է հաշտությամբ, վեցերերդում Արոնյանը պարտվել է ամերիկացի Ուեսլի Սոյին։ Առաջին շրջանի վերջին տուրում Արոնյանը պարտություն կրեց Ֆաբիանո Կարուանայից։ 8–րդ տուրում հայ շախմատիստը ոչ–ոքի է խաղացել Դին Լիժենի հետ։
Մրցաշարի 8 տուրերի արդյունքում միանձնյա առաջատարն է ամերիկացի Ֆաբիանո Կարուանան` 5,5 միավոր, նրան է հետևում Մամեդյարովը` 5 միավոր, 4,5 միավոր վաստակած Գրիշչուկը, այնուհետև 4–ական միավոր վաստակած Կրամնիկն ու Լիժենը։ Նախավերջին հորիզոնականում է 3,5 միավոր վաստակած Կարյակինը, վերջին տեղում են 3–ական միավոր վաստակած Արոնյանն ու Սոն։–0–
