Հայաստանի ազգային հավաքականի ֆուտբոլիստները «Արաբկիր» բժշկական կենտրոնում էին

ԵՐԵՎԱՆ, 30 դեկտեմբերի. /Նովոստի–Արմենիա/. Հայաստանի ազգային հավաքականի ֆուտբոլիստներ Հենրիխ Մխիթարյանը, Դավիթ Մանոյանը, Կամո Հովհաննիսյանը, Վարազդատ Հարոյանը և Տարոն Ոսկանյանը չորեքշաբթի այցելել են  «Արաբկիր» բժշկական կենտրոն, հայտնում է ՀՖՖ կայքը:

Բուժանձնակազմի ուղեկցությամբ անցնելով տարբեր բաժանմունքների հիվանդասենյակներով և մեկ առ մեկ զրուցելով երեխաների հետ` տղաները Հայաստանի ֆուտբոլի ֆեդերացիայի նվերների փաթեթները հանձնեցին երեխաներին, լուսանկարվեցին, զրուցեցին նրանց հետ, ինքնագրերով լուսանկարներ նվիրեցին:

«Ավելի քան մեկ ժամ ազգային հավաքականի ֆուտբոլիստներն անցկացրին այն երեխաների հետ, որոնք Ամանորի գիշերը դիմավորելու են բժշկական կենտրոնում: Հավաքականի տղաներին միացան նաև «Գլոբալ Շեյփերս» երիտասարդական կազմակերպության անդամները, որոնք «Ժպիտ մանուկներին» ծրագրի շրջանակում հիվանդանոցում էին նույն առաքելությամբ: Լուսավոր օր էր` ժպիտներով և խառը զգացումներով»,-ասված է հաղորդագրությունում:-0-