Երկու հայ շախմատիստներ հաղթել են Եվրոպայի 2016 թ.–ի պատանեկան առաջնությունում

ԵՐԵՎԱՆ, 28 օգոստոսի. /Նովոստի–Արմենիա/. Երկու հայ շախմատիստներ Մանվել Պետրոսյանն ու Մամիկոն Ղարիբյանը հաղթել են Պրահայում ավարտված Եվրոպայի 2016 թ.–ի պատանեկան առաջնությունում, նշվում է առաջնության կայքում։

Առաջնության արդյունքներով` Պետրոսյանը (մինչև 18 տարեկանների կատեգորիա) և Ղարիբյանը (12 տարեկան) հնարավոր 9 միավորից վաստակել են 7,5–ական միավոր։

Տարբեր տարիքային կատեգորիաներում հանդես եկող Հայաստանի ներկայացուցիչներից առաջին տասնյակում են ներառվել են Ռուդոլֆ Փաշիկյանը (8 տարեկան, 7–րդ տեղ), Արսեն Դավթյանը (10 տարեկան, 6–րդ տեղ), Շանթ Սարգսյանը (14 տարեկան, 6–րդ տեղ), Արամ Հակոբյանը (16 տարեկան, 5–րդ տեղ) և Հայկ Մարտիրոսյանը (18 տարեկան, 5–րդ տեղ)։

Աղջիկների շրջանում առաջնությանը Հայաստանը ներկայացրել են Անահիտ Մկրտչյանը (14 տարեկան, 49–րդ տեղ), Մարիամ Ավետիսյանը (16 տարեկան, 8–րդ տեղ) և Սոնա Ասատրյանը (18 տարեկան, 12–րդ տեղ)։

Մեդալային հաշվարկում Հայաստանը զբաղեցրել է երկրորդ տեղը` զիջելով միայն Ռուսաստանին, երրորդը Իսպանիան է։

Եվրոպայի պատանեկան առաջնությունն անցկացվել է վեց տարիքային կատեգորիաներում, այն մեկնարկել է օգոստոսի 17–ին և ավարտվել 27–ին։

Առաջնությունն անցկացվել է 9 փուլով, շվեյցարական համակարգով։ Առաջնությանը մասնակցել է 740 պատանի և ավելի քան 460 աղջիկ։ Ընդհանուր մրցանակային ֆոնդը կազմել է 20 հազար եվրո։–0–