Ռիոյում հայտնի է դարձել, որ հայ մարզիկներից մեկը չի մասնակցելու Օլիմպիական խաղերին

ԵՐԵՎԱՆ, 12 օգոստոսի. /Նովոստի–Արմենիա/. Ռիոյում շարունակվում են ամառային օլիմպիական խաղերը:

Հայտնի է, որ ամառային 31-րդ Օլիմպիական խաղերին Հայաստանից առաջին անգամ պետք է մասնակցեր 33 մարզիկ, այդ թիվն ամենամեծն է անկախ Հայաստանի պատմության մեջ:

Սակայն պարզվում է, որ Oլիմպիական խաղերում Հայաստանը ներկայացնող մարզիկների թիվն իրականում 32-ն է, գրում է yerkir.am–ը։

Բանն այն է , որ Հայաստանի ներկայացուցիչներից այսօր պետք է պայքարի մեջ ներգրավվեր նաև աթլետ Գոռ Ներկարարյանը, սակայն նրա անունը խաղերի պաշտոնական կայքում` Հայաստանը ներկայացնող մարզիկների ցուցակում նշված չէ:  

Yerkir.am-ի տեղեկություններով` 23-ամյա մարզիկի` Օլիմպիական խաղերին չմասնակցելու մասին հայտնի է դարձել միայն Ռիոյում, ինչն անակնկալի է բերել հայաստանյան պատվիրակությանը և առաջին հերթին` հենց մարզիկին: Այս ամենի մասին ՀԱՕԿ-ը որևէ պարզաբանում դեռ չի տվել:

Թե ի՞նչ է տեղի ունեցել իրականում, դեռևս հայտնի չէ։–0-