ԵՐԵՎԱՆ, 12 օգոստոսի. /Նովոստի–Արմենիա/. Ռիոյում ընթացող Օլիմպիական խաղերում Հայաստանը ներկայացնող 20-ամյա Անդրանիկ Կարապետյանը, ով ձեռքի ծանր վնասվածք էր ստացել, անհրաժեշտ բուժօգնություն ստացել է։
Նրա ձեռքը կոտրված չէ, պարզապես հոդի տեղաշարժ է եղել, միակ խնդիրը ջլերի հետ է, որոնք մասնակի պատռվել են, հաղորդում է Tert.am–ը` հղում անելով Հայաստանի ազգային օլիմպիական կոմիտեի գլխավոր քարտուղար Հրաչյա Ռոստոմյանին։
Ռոստոմյանի խոսքով՝ ՀԱՕԿ նախագահ Գագիկ Ծառուկյանն արդեն պայմանավորվել է ռուս բժիշկների հետ, և մարզիկը օգոստոսի 16-ին մեկնելու է Ռուսաստան՝ ջլերի պատռվածքը վերականգնելու:
«Այստեղ բժիշկները միանգամից նրան հոսպիտալ են տարել, ցավազրկել են, հոդը ֆիքսել են, որ տեղաշարժ չլինի: Հիմա մի քիչ այտուց կա։ Այդ այտուցի իջնելուց հետո միայն հնարավոր կլինի վիրահատել: Արմունկային հոդի հատվածում երկու ոսկորներ են միանում, այդ երկու ոսկորները դուրս են թռել միաժամանակ, եթե մեկը դուրս թռներ, ոսկորներից մեկն անպայման կկոտրվեր: Մոտ մեկ ամիս հետո նա կվերսկսի իր մարզումները: Մենք մեծ հույսեր ենք կապում այդ երիտասարդ մարզիկի հետ»,- նշել է Ռոստոմյանը:
Ռոստոմյանն անդրադարձել է նաև այն փաստին, թե դեպքն ինչպես է ազդել Հայաստանը ներկայացնող մարզիկների տրամադրության վրա:
Ծանրորդ Անդրանիկ Կարապետյանը վնասվածք է ստացել Ռիոյի Օլիմպիադայում (ՏԵՍԱՆՅՈւԹ)>>
«Դե բնական է, առաջին պահին բոլորը տխրեցին, բայց երբ իմացանք, որ կոտրված չի, մի քիչ ավելի լավ ենք զգում: Հոգեբանական ճնշվածություն չկա: Ամեն ինչ շատ լավ է: Բացի Անդրանիկի դեպքից, ամեն ինչ պլանավորված գնում է: Մոտ օրերս ավելի լավ կլինի»,- նշել է Ռոստոմյանը:
Հայ օլիմպիական ծանրորդի մոտ արմնկահոդի խախտում է ախտորոշվել (ՏԵՍԱՆՅՈՒԹ)>>
Ծանրամարտի 77 կգ քաշային կարգում Եվրոպայի գործող չեմպիոն Անդրանիկ Կարապետյանը պոկում վարժությունում նախ գլխավերևում պահել է 170 կգ, հետո 174 կգ, սակայն չի կարողացել բարձրացնել 176 կգ–ն։
Նույն վարժությունում Օլիմպիական խաղերի ռեկորդ է սահմանել Չինաստանի ներկայացուցիչ Խիաուջունը՝ բարձրացնելով 177 կգ։
Հրում վարժությունում Կարապետյանն առաջին մոտեցման ժամանակ չի բարձրացրել 195 կգ և երկրորդ մոտեցման ժամանակ նա, ծանրաձողը բարձրացնելիս, վնասվածք է ստացել և հանվել հետագա պայքարից։–0–
