«Կրասնոդարի» հետ խաղը կորոշի Մովսիսյանի և Օզբիլիսի ապագան «Սպարտակում»

ԵՐԵՎԱՆ, 18 նոյեմբերի. /Նովոստի–Արմենիա/. Հայաստանի հավաքականի ֆուտբոլիստներ Յուրա Մովսիսյանի և Արաս Օզբիլիսի ապագան «Սպարտակում» կորոշի նոյեմբերի 22–ին կայանալիք «Կրասնոդարի» հետ խաղը, հաղորդում է sports.ru–ն` հղում անելով «Սպորտ–Էքսպրեսին»։

Հրատարակության տվյալներով` այս մասին են վկայում նախօրեին տեղի ունեցած «Սպարտակ» ակումբի տնօրենների խորհրդի նիստի արդյունքները, որին մասնակցել են «Սպարտակի» սեփականատեր Լեոնիդ Ֆեդունը, գլխավոր տնօրեն Սերգեյ Ռոդիոնովն ու գլխավոր մարզիչ Դմիտրի Ալենիչևը։

«Սպորտ–Էքսպրեսի» հաղորդմամբ` «Սպարտակի» ֆուտբոլիստներ Յուրա Մովսիսյանի և Արաս Օզբիլիսի համար սեփական հարկի տակ «Կրասնոդարի» հետ նախատեսված առաջիկա հանդիպումը կարող է վճռորոշ լինել։

Ինչպես հայտնում է հրատարակությունը, Կիրիլ Կոմբարովն ու Ժանո Անանիձեն ձմռանը, ամենայն հավանականությամբ, կհեռանան ակումբից` անկախ «Կրասնոդարի» հետ խաղի արդյունքներից, իսկ Դմիտրի Կոմբարովն ու Դենիս Գլուշակովը, հավանաբար, կմնան «Սպարտակում» մինչև սեզոնի վերջ։–0–