ԵՐԵՎԱՆ, 28 դեկտեմբերի. /Նովոստի–Արմենիա/. Անգլիական «Մանչեսթեր Յունայթեդի» և Հայաստանի հավաքականի կիսապաշտպան Հենրիխ Մխիթարյանն ակումբի պաշտոնական կայքին տված հարցազրույցում խոսել է իր ֆուտբոլային կուռքերի, խփած ամենաէմոցիոնալ գոլի մասին, ինչպես նաև հույս հայտնել, որ նա դեռ բազմաթիվ գնդակներ կխփի մանչեսթերցիների կազմում:
««Մանչեսթեր Յունայթեդին» սկսել եմ հետևել Էրիկ Կանտոնայի ժամանակ և սիրում էի հետևել, թե ինչպես է նա խաղում: Աչքս պահում էի նաև Անդրեյ Կանչելսկիսի վրա, քանի որ նա ռուս ֆուտբոլիստ էր, դա բավականին հետաքրքիր էր: Սակայն ամենամեծ կուռքս էր Ալեքս Ֆերգյուսոնը։ Ֆուտբոլիստ դառնալուս ժամանակ կուռքս էր Զինեդին Զիդանը: Պատճառը ոչ միայն այն էր, թե ինչ էր ֆրանսիացին անում դաշտում, այլ ինչպիսի առաջատար էր: Նա միշտ խոսում էր թիմակիցների հետ և օգնում նրանց», – նշել է Մխիթարյանը, հաղորդում է armsport–ը։
Նա ավելացրել է, որ նախապաշարմունք չունի:
«Որաշակի բաներ կային, երբ երիտասարդ էի, սակայն մեծանալով, հասկացա, որ լավ ելույթ ունենալու համար անհրաժեշտ ամեն ինչ իմ գլխում է», – նշել է Մխիթարյանն ու հավելել, որ որպես ֆուտբոլիստ ամենաշատը տոնել է Հայաստանի երիտասարդական թիմի կազմում Թուրքիային խփած գոլը:
«Չափազանց կարևոր հանդիպում էր մեզ համար և հաղթական գոլի հեղինակ դարձա վերջին րոպեներին: Դա ամենամեծ էմոցիաներն են, որոնք ունեցել եմ գոլ խփելուց հետո:
Չեմ կարող ասել, թե որն է լավագույն գոլս, քանի որ դրանք շատ են: Հույս ունեմ, որ դեռ բազմաթիվ գոլեր են ինձ սպասվում «Մանչեսթեր Յունայթեդում»,- ասել է Հենրիխ Մխիթարյանը:–0–