Հայրապետյան. քանի դեռ ես ֆեդերացիայի նախագահն եմ, Մովսիսյանն, Արզումանյանն ու Կասպարովը ոտք չեն դնելու հավաքական
ԵՐԵՎԱՆ, 23 մարտի. /Նովոստի–Արմենիա/. Հայաստանի ֆուտբոլի ֆեդերացիայի նախագահ Ռուբեն Հայրապետյանը հայտարարել է, որ ազգային հավաքականի որոշ առաջատար խաղացողներ այլևս չեն լինելու գլխավոր թիմում, հաղորդում է armsport.am–ը։
Հայրապետյանը նշել է, որ Յուրա Մովսիսյանին, Ռոբերտ Արզումանյանին ու Գևորգ Կասպարովին հավաքական չհրավիրելն իր պահանջն է. նրանք այլևս չեն լինելու գլխավոր թիմում:
«Նշված ֆուտբոլիստների վերջին 2 տարիների ելույթները հավաքականում ձեր աչքի առջև են եղել: Թող մեկն ինձ ասի, որ Մովսիսյանը և Արզումանյանը նվիրված պայքարել ու խաղացել են: Այո, նրանք ունեն ֆուտբոլային բարձր որակներ, բայց դա չի նշանակում, որ հավաքականը նրանց համար զբոսանքի կամ զվարճանքների վայր է, որ գան ու զվարճանան», – ասել է Հայրապետյանը «Ֆուտբոլ +» շաբաթաթերթին տված հարցազրույցում։
ՀՖՖ նախագահ. ալբանացիների հետ խաղում դավաճանություն է տեղի ունեցել>>
Նա ավելացրել է, որ դավաճանությունը միայն խաղը վաճառելը չէ։ «Լավ, եթե Յուրա Մովսիսյանի հարցում մենք ենք մեղավոր, բա Մոսկվայի «Սպարտակից» նրան ինչո՞ւ հեռացրին: Բոլորդ տեսել եք, նա ֆուտբո՞լ է խաղացել վերջին 2 տարում, իհարկե ոչ», – նշել է ՀՖՖ նախագահը։
Նրա խոսքով` Ռոբերտ Արզումանյանի հարցազրույցներն ու հայտարարությունները տալիս են ամեն ինչի պատասխանը։
«Նա այդ քայլով ինքն իրեն մատնեց: Դրա համար ես չեմ ուզում անդրադառնալ այդ մարդկանց և ցանկանում եմ հայտարարել, որ քանի դեռ ես ֆեդերացիայի նախագահն եմ, նրանք ոտք չեն դնելու հավաքական», – ասել է Հայրապետյանը։
ՀՖՖ–ն արձագանքեց հավաքականի կազմում այլևս հանդես չգալու մասին Արզումանյանի հայտարարությանը>>
«Ինձ մեղադրում են, որ խառնվում եմ ընտրանու ներքին գործերին: Ֆուտբոլի ֆեդերացիայի նախագահը համար մեկ պատասխանատու է և պարտավոր է միջամտել հավաքականի գործերին: Եթե ես չմիջամտեմ, ո՞վ պետք է միջամտի: Այլ բան է, որ հավաքականի գործերին չպետք է միջամտեն կողմնակի մարդիկ», – շեշտադրել է Ռուբեն Հայրապետյանը։
ՀՖՖ-ի ղեկավարը նաև խոսել է պորտուգալական «Մարիտիմուի» կիսապաշտպան Գևորգ Ղազարյանի` հավաքական չհրավիրվելու մասին։
«Գևորգ Ղազարյանը չի մտնում այդ ֆուտբոլիստների մեջ (որոնք չեն հրավիրվելու.խմբ.) և նրան պետք է տարանջատել նշված 3-ից: Նա հավաքական չի հրավիրվել ոչ թե այն պատճառով, որ ես չեմ ուզում, այլ նոր գլխավոր մարզչի որոշմամբ», – ասել է Հայրապետյանը։ –0–
