ԵՐԵՎԱՆ, 7 հոկտեմբերի. /Նովոստի–Արմենիա/. Հայաստանի ֆուտբոլի հավաքական գլխավոր մարզիչ Վարուժան Սուքիասյանն ուրբաթ հայտարարեց, որ լավատեսորեն է տրամադրված աշխարհի առաջնության ընտրական փուլի շրջանակում Ռումինիայի հավաքականի հետ խաղին։
«Խաղին հայտագրված բոլոր ֆուտբոլիստները պատրաստ են։ Թիմում տրամադրվածությունը դրական է», – ասաց Սուքիասյանը հանդիպումից առաջ կազմակերպված ասուլիսի ժամանակ։
Նրա խոսքով` թիմում հայտագրված են միայն այն ֆուտբոլիստները, ովքեր խաղի պրակտիկա ունեն իրենց ակումբներում։ «Մեր մրցակիցը խաղում է ուժային և ագրեսիվ ֆուտբոլ, եթե ես հայտագրեի ոչ պատշաճ մարզավիճակում գտնվող ֆուտբոլիստների, ապա նրանք չէին կարողանա խաղալ», – ընդգծեց գլխավոր մարզիչը։
Պատասխանելով «Նովոստի–Արմենիա» գործակալության հարցին, որը վերաբերում է Արաս Օզբիլիսի մարզավիճակին, ով ևս խաղալու պրակտիկա չունի իր ակումբում` «Բեշիքթաշում», Սուքիասյանը նշեց, որ Օզբիլիսը կարող է օգնել թիմին իր փորձով, չնայած, ամենայն հավանականությամբ, չի կարողանա խաղալ բոլոր 90 րոպեների ընթացքում։
Նա նաև տեղեկացրեց, որ բժիշկները մինչև երեկ կապի մեջ են եղել Հայաստանի հավաքականի և «Մանչեսթեր Յունայթեդ» ակումբի կիսապաշտպան Հենրիխ Մխիթարյանի հետ, ով վնասվածք է ստացել։ Նրանց խոսքերով` Մխիթարյանը չի կարող դաշտ դուրս գալ ռումինացիների հետ հանդիպմանը։
Նա նաև կոչ արեց լրագրողներին և երկրպագուներին թուլացնել լարվածությունն ու աջակցել թիմին։
Հայաստանի հավաքականի պաշտպան Լևոն Հայրապետյանն իր հերթին հայտարարեց, որ թիմում տիրում է հաղթական մթնոլորտ, և խաղացողները կանեն ամեն ինչ` առաջիկա խաղում երեք միավոր վաստակելու համար։
Աշխարհի 2018 թ.–ի առաջնության ընտրական փուլի շրջանակում Հայաստան–Ռումինիա հանդիպումը տեղի կունենա հոկտեմբերի 8–ին Երևանի Հանրապետական մարզադաշտում։
Հայաստանի հավաքականն առաջին հանդիպման ժամանակ արտագնա խաղում 0։1 հաշվով պարտվեց դանիացիներին և զրո միավորով զբաղեցնում է խմբի վերջին տեղը։ Դանիայի հավաքականը վաստակել է երեք միավոր։ Լեհաստանի, Ռումինիայի, Ղազախստանի և Չեռնոգորիայի հավաքականները ոչ–ոքի են խաղացել` վաստակելով մեկական միավոր։ –0–
Ծանոթացեք լուրերին առաջինն ու քննարկեք դրանք մեր Telegram-յան ալիքում