Գոռ Մինասյանը՝ Եվրոպայի փոխչեմպիոն, Ռուբեն Ալեքսանյանը՝ բրոնզե մեդալակիր

ԵՐԵՎԱՆ, 8 ապրիլի. /Նովոստի–Արմենիա/. Խորվաթիայի Սպլիտ քաղաքում ավարտվեց ծանրամարտի Եվրոպայի առաջնությունը: Մրցապայքարը եզրափակեցին գերծանր (+105 կգ) քաշային տղամարդիկ, որոնց մեջ էին Հայաստանի ներկայացուցիչներ, Ռիոյի օլիմպիական խաղերի արծաթե մեդալակիր Գոռ Մինասյանը և Ռուբեն Ալեքսանյանը, հաղորդում է ՀԱՕԿ մամուլի ծառայությունը։

Գոռ Մինասյանը երկամարտի 446 (211+235) կիլոգրամով նվաճեց Եվրոպայի փոխչեմպիոնի կոչումը, Ռուբեն Ալեքսանյանը 434 (190+244) կիլոգրամով դարձավ բրոնզե մեդալակիր:

Գոռը փոքր արծաթ նվաճեց նաև պոկում վարժությունում (211 կգ), իսկ Ռուբենը` փոքր բրոնզ հրումում (244 կգ):

Եվրոպայի չեմպիոն դարձավ Վրաստանի ներկայացուցիչ Լաշա Տալախաձեն՝ երկամարտի 467 կիլոգրամով:

Ոչ պաշտոնական թիմային հաշվարկում (տղամարդիկ և կանայք) Հայաստանը 11 մեդալով հանգրվանեց 5-րդ հորիզոնականում: