ԵՐԵՎԱՆ, 27 օգոստոսի. /Նովոստի-Արմենիա/. Ուրբաթ լույս շաբաթ գիշերը Ռիո դե Ժանեյրոյից ժամանել է Ամառային օլիմպիական խաղերի Հայաստանի օլիմպիական հավաքականը, որոնց թվում էին նաև ոսկե մեդալ նվաճած Արթուր Ալեքսանյանը, արծաթե մեդալակիրներ Միհրան Հարությունյանը (ըմբշամարտ), Գոռ Մինասյանն ու Սիմոն Մարտիրոսյանը (ծանրամարտ)։
Պաշտոնատար անձանցից մեդալակիրներին եկել էին դիմավորելու ՀՀ վարչապետ Հովիկ Աբրահամյանը, սպորտի նախարար Գաբրիել Ղազարյանը և Հայաստանի ազգային Օլիմպիական կոմիտեի նախագահ Գագիկ Ծառուկյանը:
Հայաստանը ցնծությամբ դիմավորեց օլիմպիական հերոսներին (ԼՈւՍԱՆԿԱՐՆԵՐ)>>
ՀԱՕԿ լրատվության բաժնի հաղորդմամբ, ՀԱՕԿ նախագահ Գագիկ Ծառուկյանը հունահռոմեական ոճի ըմբիշ Միհրան Հարությունյանի պարանոցից հանեց արծաթե մեդալը և կախեց ոսկե մեդալ՝ դրանով ևս մեկ անգամ ցույց տալով, որ Միհրան Հարությունյանը բոլորի համար իրական չեմպիոնն է:
«Բազմամարդ օդանավակայանում կանգնելու տեղ չկար: Հայ օլիմպիականներին դրսում մեծ հրավառություն էր սպասվում, որից հետո նստեցին իրենց համար նախատեսված ավտոբուսը և ուղևորվեցին Հանրապետության հրապարակ: Հազարավոր երկրպագուներ վանկարկում էին Հարությունյանի անունը, ինչը շատ հուզեց վերջինիս և արցունքներն աչքերին խոստացավ, որ նման ուրախություն իր ազգին նորից է ցանկանում պարգևել», - նշվում է հաղորդագրության մեջ:
Գյումրիի «Շիրակ» ակումբը պատրաստ է դիմավորել Օլիմպիական խաղերի հայ չեմպիոններին>>
Հայաստանը Ռիոյի Օլիմպիադայում ներկայացրեցին ռեկորդային թվով մարզիկներ` 33 մարզիկ 8 մարզաձևերում։ Հայկական հավաքականն ընդհանուր առմամբ նվաճեց չորս մեդալ` մեկ ոսկե և երեք արծաթե` մեդալային հաշվարկում զբաղեցնելով 42–րդ տեղը 206 մասնակից երկրների շրջանում։
Օլիմպիական խաղերի չեմպիոն հռչակվեց հունահռոմեական ոճի ըմբիշ Արթուր Ալեքսանյանը։ Արծաթե մեդալներ նվաճեցին ծանրորդներ Սիմոն Մարտիրոսյանն ու Գոռ Մինասյանը, ինչպես նաև հունահռոմեական ոճի ըմբիշ Միհրան Հարությունյանը, ով զրկվեց ոսկե մեդալից մրցավարական կանխակալության պատճառով։ –0–
