Արոնյանը զբաղեցնում է վերջին տեղը Հավակնորդների մրցաշարի առաջին շրջանի արդյունքում

ԵՐԵՎԱՆ, 19 մարտի. /Նովոստի–Արմենիա/. Գրոսմայստեր Լևոն Արոնյանը Հավակնորդների մրցաշարի 7–րդ տուրի արդյունքում կիսում է մրցաշարային աղյուսակի վերջին տեղն ամերիկացի Ուեսլի Սոյի հետ։

7–րդ տուրում Արոնյանն ուժերը չափել է մրցաշարային աղյուսակի առաջատար, ամերիկացի Ֆաբիանո Կարուանայի հետ և զիջել է 37–րդ քայլին։ Զուգահեռ հանդիպումներում ոչ–ոքի են ավարտվել Կրամնիկ–Լիժեն և Գրիշչուկ–Մամեդյարով պարտիաները, իսկ Կարյակինը հաղթել է Սոյին։

Առաջին երկու տուրերում Արոնյանը ոչ-ոքի է խաղացել չինացի Դին Լիժենի և ադրբեջանցի Շահրիյար Մամեդյարովի հետ, երրորդում` պարտվել է Վլադիմիր Կրամնիկին, իսկ չորրորդում հաղթանակ է տարել Սերգեյ Կարյակինի նկատմամբ: Հինգերորդ տուրի Արոնյան-Գրիշչուկ պարտիան ավարտվել է ոչ-ոքի: 6–րդ տուրում Արոնյանը զիջել է ամերիկացի Ուեսլի Սոյին։

Մարտի 19–ին կայանալիք 8–րդ տուրում Արոնյանն ուժերը կչափի Լիժենի հետ և կխաղա սև խաղաքարերով։

Հավակնորդների մրցաշարն անցկացվում է Բեռլինում: Այն կտևի մինչև մարտի 28-ը: Հաղթողն իրավունք կունենա խաղալ աշխարհի չեմպիոն Մագնուս Կարլսենի հետ նոյեմբերի 9-28-ը Լոնդոնում: -0-