ԵՐԵՎԱՆ, 1 հունիսի. /Նովոստի-Արմենիա/. Դուք մարզվում եք, քնում եք ոչ պակաս, քան յոթ ժամ, պահպանում եք սպիտակուցների, ճարպերի և ածխաջրերի հարաբերակցությունն առօրյա սննդակարգում, բայց... փափուկ կլորիկ փորիկը փչացնում է ամբողջ պատկերը՝ չցանկանալով հեռանալ։ Պատճառները կարող են տարբեր լինել, և դրանցից մի քանիսը որևէ կապ չունեն մարմնի այդ մասի հետ։
1. Բանուկ փողոցների աղմուկը
Եթե ապրում եք բանուկ փողոցում, ապա իրանի մի քանի սանտիմետր ավելացնելու ռիսկն ավելանում է 29 տոկոսով։ Դրա պատճառն այն է, որ աղմուկը հանգեցնում է կորտիզոլ հորմոնի ավելացմանը, ինչը կապված է որովայնային ճարպի կուտակման հետ, ասում են Occupational & Environmental Medicine-ում հրապարակած հետազոտության արդյունքները։ Գիտնականները խորհուրդ են տալիս դրա դեմ պայքարել հատուկ աղմկամեկուսիչ ականջակալների օգնությամբ, լսել հանգստացնող երաժշտություն։
2. Դիետիկ գազավորված ըմպելիք խմելու սովորությունը
Եթե խմեք օրական մոտ 500 մլ դիետիկ գազավորված ըմպելիք, ապա ձեր իրանի ծավալը կարող է ավելանալ տասը սանտիմետրով իննուկես տարվա ընթացքում։ Իսկ եթե խմեք սովորական գազավորված ընպելիք, ապա կավելացնեք 2,5 սմ։ Նման արդյունքը պայմանավորված է դիետիկ գազավորված ընպելիքում պարունակվող արհեստական քաղցրացուցիչներով, որոնք գործում են այնպես, որ մեր ուղեղը կշտանալու մասին ազդանշան չի ստանում, ու արդյունքում մենք անդադար քաղցրի պահանջ ենք զգում։
3. Մի քանի խնդրի առկայությունը
Բրաունի համալսարանի գիտնականները հայտնաբերել են, որ մարդիկ, ովքեր ի վիճակի են կենտրոնանալ միայն մեկ կոնկրետ առաջադրանքի վրա, միջինը 0,5 կգ պակաս ճարպ են ունենում որովայնի հատվածում, քան նրանք, ովքեր անընդհատ մտածում են առաջիկա տարբեր խնդիրների մասին։
Գիտնականների կարծիքով, դա կատարվում է այն պատճառով, որ կենտրոնացած մարդիկ ի վիճակի են գնահատելու սեփական զգացողություններն ու զգացումներն ավելի օբյեկտիվ։
4. Կալցիումի պակասը
Կանանց մոտ 57 տոկոսը չի ստանում կալցիումի օրական չափաբաժինը, և դա անդրադառնում է նրանց իրանի հատվածի ծավալի վրա։ Սակայն Nutrients ամսագրում հրապարակված արդյունքների համաձայն, կալցիումի բարձր պարունակությամբ կաթնամթերքի օգտագործումը կարող է օգնել այդ խնդրի լուծման հարցում։
Գիտնականներն այն կարծիքին են, որ կալցիումի բարձր պարունակությամբ մթերքներն ավելի լավ են ճնշում ճարպը պահպանող հորմոնը։ Այդ մթերքներից են՝ բրոկոլին, կալեն և տոֆուն։
5. Դեպի աշխատավայր տանող երկար ճանապարհը
Պարզվում է, որ որովայնի ավելորդ ճարպի վրա կարող է ազդել նաև մինչև աշխատավայր ընկած ճանապարհը։ Դրա մասին են վկայում Վաշինգտոնի համալսարանի հետոզոտության արդյունքները։
Պարզվել է, որ որքան երկար ես հասնում աշխատավայր, այնքան մեծանում է իրանի ծավալը։ Պատճառը պարզ է՝ որքան ավելի երկար է ճանապարհը, այնքան քիչ ժամանակ է մնում մարզադահլիճի համար։ Ամենալավ պայքարի ձևը՝ մի կանգառը ոտքով գնալն է։
6. Անհանգիստ քունը
Բանն այն չէ, թե որքան եք քնում, այլ այն, թե՝ ինչպես։ Քնի որակը շատ մեծ ազդեցություն ունի նյութափոխանակության և վերականգնողական գործընթացների վրա։ Բժշկական գիտությունների դոկտոր Խոսե Կոլոնն ասում է, որ իրականում գիշերվա ընթացքում մարդու՝ մեկ-երկու անգամ արթնանալը բնական է։ Խնդիրները սկսվում են այն ժամանակ, երբ նա դրանից հետո չի կարողանում քնել։ Դա մարդուն դյուրագրգիռ է դարձնում, ինչն էլ ավելացնում է կորտիզոլի մակարդակը։
Այնպես որ, ուշադիր եղեք ձեր օրգանիզմի նկատմամբ ու նրա հաղորդած ազդակներին։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
