Ուզու՞մ եք նիհարել. գինի և շոկոլադ օգտագործեք

ԵՐԵՎԱՆ, 14 ապրիլի. /Նովոստի-Արմենիա/. Նիհարել ցանկացողներին մասնագետները նոր դիետա են առաջարկել, որը հիմնված է չոր կարմիր գինու և բնական սև շոկոլադի վրա: Ավելորդ քաշից ազատվելու արտասովոր մեջոցը ներկայացրել են Թագավորական քոլեջի բրիտանացի գիտնականները, հաղորդում է ruporters.ru-ն` հղում անելով «Միր 24»-ին:

Իրենց նոր հետազոտության համար գիտնականները երկար ժամանակ հետևել են երկվորյակների, ընդ որում, նրանցից մեկը բարեկազմ էր, մյուսն ավելորդ քաշ ուներ, որից փորձում էր ազատվել: Նման զույգերում բարեկազմ մարդիկ երկար ժամանակ օգտագործում էին շոկոլադ և կարմիր գինի, ինչից հետո մասնագետները ևս մեկ անգամ կարողացան համոզվել, որ շոկոլադն ու կարմիր գինին դրական են ազդում օրգանիզմի վրա։

Դիետոլոգները կարծում են, որ չոր կարմիր գինու և բնական սև շոկոլադի շնորհիվ կարելի է ազատվել մի քանի կիլոգրամներից, ինչպես նաև նոր քաշը նորմայի մեջ պահպանել երկար ժամանակի ընթացքում: Դրա համար հարկավոր է շաբաթը 1-2 բեռնաթափման օր կազմակերպել, որոնց ընթացքում հարկավոր է օգտագործել միայն գինի և շոկոլադ։

Գիտնականների խոսքերով, կարմիր գինին և սև շոկոլադը, չափավոր քանակությամբ օգտագործելու դեպքում, դրական են ազդում աղիների միկրոֆլորայի վրա, որն իր հերթին օգնում է յուրացնել օգտակար նյութերը և մեծ ազդեցություն է ունենում մարդու քաշի վրա: Բացի այդ, գինու և շոկոլադի մեջ կան պոլիֆենոլներ, որոնք նպաստում են իմունիտետի ամրապնդմանն ու վիտամինների և միկրոտարրերի յուրացմանը։–0–