Ամերիկացի կինոռեժիսոր Ջորջ Լուկասը (George Lucas) գործընկեր Սթիվն Սփիլբերգի (Stephen Spielberg) հետ միասին, ով ստեղծել է արկածախնդիր հնագետ Ինդիանա Ջոնսի մասին պատմությունը, հայտարարել է, որ արդեն հասկացել է, թե որ ժանրում և ինչպիսին պետք է լինի պատմության հինգերորդ մասը, երեքշաբթի հաղորդում է Сollider.com ռեսուրսը:
«Ես Սփիլբերգին պատմեցի, թե ինչ պատմություն է դա, չնայած դեռ չեմ մտածել, թե ինչի շուրջ կծավալվի այն: Ընդհանուր ուղղությունը հասկանալի է, պարզապես հարկավոր է գտնել պատմության կորիզը», - մեջբերում է կայքը Լուկասի խոսքերը, հաղորդում է ՌԻԱ Նովոստին:
Պատմության նախկին չորս մասերը նկարահանած Սփիլբերգը մի քանի շաբաթ առաջ տեղեկացրել է, որ նրանք Լուկասի հետ արդեն պայմանավորվել են ապագա պատմության ժանրի շուրջ, իսկ 69-ամյա Հարիսոն Ֆորդը, ով գլխավոր դերակատարն է, պատրաստակամություն է հայտնել նկարահանվել ֆիլմում «քանի դեռ կենդանի է»:
«Սակայն սցենար դեռ չկա», - զգուշացնում է Սփիլբերգը:
Ինդիանա Ջոնսի մասին պատմող պատմությունը բաղկացած է չորս մասից՝ «Ինդիանա Ջոնս. կորած տապան փնտրողները» (Indiana Jones and the Raiders of the Lost Ark, 1981), «Ինդիանա Ջոնսն ու Ճակատագրի տաճարը» (Indiana Jones and the Temple of Doom, 1984), «Ինդիանա Ջոնսն ու խաչակրած վերջին արշավանքը» (Indiana Jones and the Last Crusade, 1989) և քսան տարի անց նկարահանված ու 786 մլն դոլար հավաքած «Ինդիանա Ջոնսն ու բյուրեղյա գանգի թագավորությունը» (Indiana Jones and the Kingdom of the Crystal Skull, 2008), որտեղ ֆիլմի հերոս Հարիսոն Ֆորդը որդի է ունենում, որի դերակատարն է Շայի ԼաԲեֆը (Shia LaBeouf): 2009թ.-ին խոսակցություններ էին շրջանառվում, որ ԼաԲեֆը Ջոնս կրտսերի դերում կդառնա հինգերորդ ֆիլմի առանցքային դերակատարը, սակայն Լուկասը բոլոր հարցերին պատասխանում է մեկ բառով՝ «տեսնենք»:-0-
