Առողջ կենսակերպի քարոզչությունը թույլ կտա խուսափել բազմաթիվ հիվանդություններին և, առաջին հերթին, նվազեցնել սրտանոթային հիվանդությունների ռիսկը, ուրբաթ հրավիրված ասուլիսի ժամանակ հայտնեց Երևանի գլխավոր սրտաբան Պարունակ Զելվեյանը:
«Հայաստանում մահվան ավելի քան 50 տոկոսն արձանագրվում է սրտանոթային հիվանդությունների պատճառով: Այս վիճակագրությունը վկայում է առողջ կենսակերպի և համապատասխան այլ միջոցառումների քարոզման անհրաժեշտությունը և կարևորությունը»,- նշեց նա:
Սրտաբանի խոսքով, սրտի հիվանդությունների զարգացման գլխավոր պատճառը մարդու հեռանալն է բնությունից, պասիվ կենսակերպը, ֆաստ-ֆուդի չարաշահումը:
«Ժամանակակից հասարակությունում մարդը չի սպառում սննդի հետ ստացած ողջ էներգիան: Այդ ամենը ճարպային գոյացությունների տեսքով կուտակվում է օրգանիզմում և մի շարք հիվանդությունների պատճառ դառնում»,- ընդգծեց Զելվեյանը:
Առողջապահության նախարարության հանրային առողջության վարչության պետ Ալեքսանդր Բազարչյանն իր հերթին նշեց, որ ոմանք առողջ կենսակերպ ասելով՝ ֆիզիկական ակտիվություն են հասկանում:
«Սակայն այդ հասկացությունն իր մեջ ներառում է նաև ճիշտ սնվելը, վնասակար սովորություններից՝ ծխելուց և ալկոհոլի չափազանց շատ օգտագործումից հրաժարվելը, ինչպես նաև հոգեբանական հավասարակշռությունը և առողջ մթնոլորտը, որում մարդն ապրում և աշխատում է»,- ասաց նա:
Բազարչյանն ավելացրեց, որ պետք է նաև խուսափել յուղոտ, աղի սննդի, քաղցր և գազավորված ըմպելիքների, ֆաստ-ֆուդի չարաշահումից: -0-
