Վարչապետը շնորհավորել է հայ երիտասարդությանը Երիտասարդության միջազգային օրվա կապակցությամբ

ՀՀ վարչապետ Տիգրան Սարգսյանը հինգշաբթի կառավարության անունից շնորհավորել է հայ երիտասարդությանը Երիտասարդության միջազգային օրվա կապակցությամբ:

Կառավարության ղեկավարը երիտասարդ սերնդին մաղթել է հաջողություն, երջանկություն և եռանդ, որպեսզի հաղթահարելով ժամանակակից աշխարհի մարտահրավերները, նրանք կարողանան Հայաստանի համար բարենպաստ ապագա ապահովել:

«Այս գեղեցիկ տոնն իր ավանդույթներով տանում է դեպի 1945 թվական, երբ Երկրորդ համաշխարհային պատերազմից հետո 63 ազգություն ներկայացնող երիտասարդությունը հավաքվեց Լոնդոնում և Երիտասարդական դաշնություն հիմնեց, որից հետո այդ օրը դարձավ Երիտասարդության միջազգային օր»,- կառավարական նիստից առաջ ասաց Սարգսյանը:

Ըստ նրա, տոնի իմաստն այն է, որ երիտասարդության ներկայացուցիչներն իրենց վրա են վերցնում ապագայի պատասխանատվությունը: «Եվ մենք պետք է այնպիսի մթնոլորտ ստեղծենք, որտեղ մեր երիտասարդությունը հասկանա այդ պատասխանատվությունը, որը ժամանակակից աշխարհում կրթության ապահովում է ենթադրում: Եթե մենք կիրթ երիտասարդություն ունենանք, կունենանք ապագա»,- ընդգծեց Սարգսյանը: -0