Լավ կլիներ, որ հայ երեխաները դպրոցում ուսումնասիրեին ԱՊՀ պատմությունը. ՀՀԿ

Հայ աշակերտներին օգտակար կլիներ ուսումնասիրել ԱՊՀ պատմությունը նորագույն պատմության դպրոցական ծրագրի շրջանակներում, հինգշաբթի հայտարարեց ԱՊՀ երկրների միջխորհրդարանական վեհաժողովի մշակույթի հարցերի հանձնաժողովի նախագահի տեղակալ, ՀՀԿ խմբակցության քարտուղար Էդուարդ Շարմազանովը:

Հանձնաժողովի նիստի շրջանակներում քննարկվել են Համագործակցության շրջանակներում մշակույթի, տեղեկատվության, զբոսաշրջության և սպորտի ոլորտի արդիական հարցերը, այդ թվում բարձրացվել է ԱՊՀ երկրների պատմության գրքի ստեղծման հարցը:
«Գիրքը պետք է ոչ թե այս կամ այն պետության պատմության վերաբերյալ լինի, այլ ԱՊՀ 20-ամյա պատմության մասին, ԱՊՀ-ի մասին՝ որպես կառույցի և համաշխարհային գլոբալիզացիայի գործընթացում նրա ունեցած դերի մասին»,- ասաց Շարմազանովը:

ԱՊՀ երկրների միջխորհրդարանական վեհաժողովի մշակույթի հարցերի հանձնաժողովի նախագահ Եվգենի Տարլոն էլ նշեց, որ շատ դպրոցականների մոտ հարց է առաջանում՝ «ի՞նչ է ԱՊՀ-ն» և որպեսզի ճիշտ և առավելագույն մանրամասն պատասխան տրվի այդ հարցին, անհրաժեշտ է գիրք ստեղծել, որը սպառիչ տեղեկություն կտրամադրի: 

«Դասագրքի պատրաստումը հեշտ չէ, այն պետք է լինի կշռադատված, ճշգրիտ, այնտեղ պետք է ոչ մի կասկածելի արտահայտություններ չլինեն, որոնք կարող են համագործակցության երկրներից որևէ մեկի շահերը շոշափել»,- ընդգծեց Տարլոն:
Նիստի ընթացքում նաև անդրադարձ կատարվեց երկրի հնագիտական ժառանգության պահպանման հարցին:

«Համագործակցության երկրները սեփական մշակույթի հսկայական պատմություն ունեն՝ նյութական և հոգևոր, և այժմ դա պեղումների առարկա է հանդիսանում, մասնավորապես՝ անօրինական պեղումների կամ շինարարների անփույթ վերաբերմունքի, որի հետևանքով քանդվում են երկրի պատմության հուշարձանները»,- ավելացրեց Տարլոն:
Ըստ նրա, հնագիտական ժառանգության պահպանման մասին օրենքի մոդել կմշակվի, որը կարող է հիմք հանդիսանալ առանձին երկրների ազգային օրենսդրության համար:

Բացի այդ, հանձնաժողովի նախագահը տեղեկացրեց, որ հանձնաժողովի օրակարգի համաձայն քննարկվելու է 2014թ.-ի Սոչիի օլիմպիադայի շրջանակներում Երաժշտական արվեստի միջազգային փառատոնի անցկացման հարցը: -0-