Ամենայն Հայոց Կաթողիկոսը շնորհավորական ուղերձ է հղել մանկավարժներին, ուսանողներին և աշակերտներին

ԵՐԵՎԱՆ, 1 սեպտեմբերի. /Նովոստի-Արմենիա/. Գիտելիքի, գրի և դպրության օրվա կապակցությամբ Հայոց Կաթողիկոս Գարեգին Բ-ն շնորհավորական ուղերձ է հղել մանկավարժներին, ուսանողներին և աշակերտներին:

«Լուսավոր այս օրը վերստին բացվել են կրթօջախների դռները: Խնդությամբ են համակված հոգիները սաների և ուսուցիչների, ովքեր նոր ուսումնական տարին սկսում են նոր հույսերով և բարին ու գեղեցիկը ճանաչելու լավատեսությամբ»,- ասվում է Վեհափառի ուղերձում։

Ամենայն Հայոց Կաթողիկոսն ուրախալի է համարել այն փաստը, որ հավատարիմ իրենց կոչմանը և կրթադաստիարակչական հարուստ ավանդներին, այսօր նվիրյալ մանկավարժները երիտասարդ սերնդին սնում և կրթում են ազգային ոգով և հայրենի սրբազան արժեքներով, սերմանում են նրանց հոգում ազնվության ու աշխատասիրության, հայրենասիրության ու ծառայասիրության բարի սերմերը:

Նա կոչ է արել աշակերտներին և ուսանողներին լինել ուսումնասեր ու ջանադիր ուսման մեջ, ուշադիր ու պարտաճանաչ իրենց պարտականությունների հանդեպ, քանզի կրթությունն իրենց  համար լուսավոր և օրհնյալ պատվար է լինելու ողջ կյանքում:
Կաթողիկոսը հիշեցրել է Սուրբ Գրքի խոսքերը. «Մի՜ թող իմաստությունը, և նա կպաշտպանի քեզ, սիրի՜ր այն, և նա կպահպանի քեզ» (Առակաց Դ 6):

Գարեգին Բ-ն նշել է, որ իրապես, կրթության մեջ ձեռքբերումները  պիտի արգասիքներ բերեն, և թույլ կտան  ծառայել Հայրենիքին և ժողովրդին:

«Առ Աստված աղոթքով մաղթում ենք հաջողություններով առատ և արգասավոր նոր ուսումնական տարի, հայցում ենք եռանդ և կորով մեր մանկավարժներին և պայծառ միտք ու ջանադիր աշխատասիրություն սովորողներին»,- ասվում է ուղերձում։ -0-