Հայաստանում շուտով օտարերկրացիներից հատուկ թույլտվություն կպահանջվի աշխատելու համար, ուրբաթ լրագրողներին ասաց Հայաստանի տարածքային կառավարման նախարարության Պետական միգրացիոն ծառայության պետ Գագիկ Եգանյանը։
«Օտարերկրացիների մասին» օրենքը, որն ընդունվել է Հայաստանում դեռևս 2006 թվականի դեկտեմբերին, աշխատանքի թույլտվության տրամադրում է պահանջում օտարերկրացիներից, բայց այդ պահանջն առայսօր չի կատարվել, որովհետև համապատասխան ենթաօրենսդրական ակտեր չեն ընդունվել »,- ասաց Եգանյանը։
Ըստ նրա, Հայաստանի կառավարության կողմից նմանատիպ որոշում ընդունելուց հետո հայ գործատուները կկարողանան աշխատանքային պայմանագրեր կնքել միայն այն քաղաքացիների հետ, ովքեր համապատասխան թույլտվություն կունենան։
Եգանյանը միաժամանակ ընդգծեց, որ աշխատանքի ընդունվելիս թափուր տեղի դեպքում առաջնայնությունը կտրվի Հայաստանի քաղաքացուն։
«Օրենքում հստակ ամրագրված է, որ եթե մեր քաղաքացին չհամապատասխանի նշված թափուր տեղին, ապա այդ հաստիքին կարող է հավակնել օտարերկրացին»,- ասաց նա։ «Օտարերկրացիների մասին» օրենքի համաձայն, Հայաստանի Հանրապետության գործատուներն իրավունք ունեն օտարերկրացի աշխատակցի հետ (ծառայությունների մատուցման) աշխատանքային պայմանագիր կնքել և օգտագործել նրա աշխատանքը լիազոր մարմնի կողմից օտարերկրացուն տրված աշխատանքային թույլտվության հիման վրա։
Օտարերկրացի աշխատակցին Հայաստանի Հանրապետության պետական կառավարման լիազոր մարմնի կողմից օտարերկրացիների աշխատանքի և զբաղվածության բնագավառում աշխատանքի թույլտվության տրամադրման ժամանակ հաշվի են առնվում Հայաստանի աշխատանքի շուկայի կարիքները և այդ շուկայում տեղի ունեցող գործընթացները։
Հայաստանի Հանրապետության աշխատանքի շուկայի կարիքների գնահատման նպատակով Հայաստանի Հանրապետության կառավարության որոշմամբ գործատուի համար սահմանվում է ժամկետ, որի ընթացքում նա պարտավորվում է համալրել իր ունեցած թափուր աշխատատեղը ՀՀ քաղաքացիներով։
Սահմանված ժամկետում Զբաղվածության հանրապետական ծառայության կողմից գործատուի պահանջներին համապատասխանող թեկնածության առաջարկի բացակայության դեպքում գործատուն կարող է ինքը փնտրել այդ պահանջներին համապատասխանող օտարերկրացու և դիմել լիազոր մարմնին՝ կոնկրետ օտարերկրացի աշխատակցին Հայաստանի Հանրապետության կառավարության որոշմամբ սահմանված կոնկրետ ժամկետով և անհրաժեշտ փաստաթղթերի առկայությամբ աշխատանքային թույլտվություն տրամադրելու համար։
Առանց հատուկ թույլտվության կարող են աշխատել, մասնավորապես, Հայաստանում մշտական և հատուկ բնակության իրավունք ունեցող անձինք, դիվանագիտական ներկայացուցչությունների և հյուպատոսարանների, ինչպես նաև միջազգային կազմակերպությունների և դրանց ներկայացուցչությունների աշխատակիցների ընտանիքի անդամներ, օտարերկրյա պետությունների առևտրային կազմակերպությունների աշխատակիցներ։
Առաջիկա փոփոխությունների հետ կապված բոլոր մանրամասներին կարելի է ծանոթանալ ծառայության - www.smsmta.am կայքի «Օտարերկրացիների մուտքն ու կացությունը Հայաստանում» հատուկ բաժնից։ -0-
