Ընտանեկան ավանդույթների պատճառով մանկական թրաֆիքինգի խնդիրն այդքան էլ արդիական չէ Հայաստանում

Ընտանեկան ավանդույթների պատճառով մանկական թրաֆիքինգի խնդիրն այդքան էլ արդիական չէ Հայաստանում չորեքշաբթի մանկական թրաֆիքինգի հարցերի շուրջ կազմակերպված Երևան-Մոսկվա տեսակամուրջի ընթացքում ասաց «Հայաստանի մանկական թրաֆիքինգի կանխումը» People in Need չեխական իրավապաշտպան կազմակերպության նախագծի ղեկավար Տաթևիկ Բեջանյանը:

Պաշտոնական տվյալների համաձայն, վերջին վեց տարիների ընթացքում գրանցված հինգ դեպքերի հետևանքով Հայաստանում 11 երեխա է տուժել: Հայաստանում գրանցված հինգ դեպքերից երեքի վերաբերյալ արդեն դատարանի վերջնական վճիռներ կան: Գործերից մեկը գտնվում է դատավարության փուլում, իսկ մյուսը՝ հետաքննության:
«Հայաստանում ընտանիքը հիմնական սոցիալական բջիջն է, և մենք ձգտում ենք մեր հիմնական հարստության՝ հայկական ընտանիքի  պահպանմանը և հուսով ենք, որ չենք կորցնի այդ ընտանեկան արժեքները»,- ասաց Բեջանյանը:

Ամեն դեպքում, ըստ նրա, հայ երեխաները պաշտպանված չեն Ինտերնետի կամ հեռուստատեսությամբ ցուցադրվող ֆիլմերի բացասական ազդեցությունից, որոնք նույնպես հին ընտանեկան ավանդույթների ոչնչացման պատճառ են դառնում:

Սակայն, ինչպես նշեց փորձագետը, դա գլոբալ հարց է, որը վերաբերում է ոչ միայն Ռուսաստանին կամ Հայաստանին, այլ  անդրադառնում է հետխորհրդային տարածաշրջանի բոլոր երկրներին:
Այս կապակցությամբ նա ընդգծեց բնակչության իրազեկության մակարդակի բարձրացման կարևորությունը, որն այժմ բավական ցածր է: Դրա համար People in Need-ն ուսուցիչների, մանկապարտեզների աշխատակիցների, խնամակալության մարմինների, սոցիալական ծառայությունների, ոստիկանների և երեխաների հետ աշխատող պետական կառույցների համար դասընթացներ է անցկացրել՝ մանկական թրաֆիքինգը կանխելու նպատակով:
Ըստ նրա, առանձին աշխատանք է անցկացվում թափառաշրջիկ երեխաների հետ, ովքեր առանձին դեպքերում խնամակալության մարմիններ են ուղարկվում:

«Հայաստանի մանկական թրաֆիքինգի կանխումը» Եվրամիության ծրագիրը գործել է 27 ամիսների ընթացքում՝ 2009թ.-ի մայիսից մինչև 2011թ.-ի հուլիսը: Ծրագիրն իրականացվել է People in Need չեխական իրավապաշտպան կազմակերպության կողմից: Դրա անցկացման համար ԵՄ-ն ավելի քան 400 հազար եվրո է հատկացրել:

People in Need ոչ առևտրային կազմակերպություն է, ստեղծվել է 1992թ.-ին Պրահայում: Կազմակերպությունը նախագծերն իրականացնում է ինչպես իր երկրում, այնպես էլ դրա սահմաններից դուրս:
People in Need կազմակերպությունը Հայաստանում աշխատում է 2003թ.-ից և նախագծեր է իրականացնում Հայաստանից անօրինական միգրացիայի կանխման և տեղական ինքնակառավարմանն օգնելու ուղղությամբ: -0-