Հայ Առաքելական Եկեղեցու դեմ արշավներն ուղղված են ազգի թուլացմանը, ասել է Ամենայն Հայոց Հայրապետը Հայաստանի Հանրային հեռուստատեսության եթերից:
Ըստ նրա, այսօր Եկեղեցուն որոշակի ենթատեքստով ուղղված մեղադրանքները զուրկ են որևէ հիմքից և անարդար են։
Վերջին օրերին Facebook ցանցում ստեղծվեցին Ամենայն Հայոց Կաթողիկոսի հրաժարականը պահանջող մի քանի խմբեր, ինչին հետևեց կոնտրակցիան, և այժմ Ինտերնետում ակտիվ պայքար է ընթանում կաթողիկոսի հրաժարականի կողմնակիցների և հակառակորդների միջև։
Մասնավորապես, ցանցում արծարծվում է Հայկական ճարտարապետության ուսումնասիրման հասարակական կազմակերպության ղեկավար Սամվել Կարապետյանի հայտարարությունն այն մասին, որ, իբր, խոսելով Սանահինի տաճարի մասին, Կաթողիկոսը մի անգամ ասել է. «Ես գործ չունեմ սարերում գտնվող այդ եկեղեցիների հետ»։ Սուրբ Էջմիածինը դա կտրականապես հերքում է։
«Եկեղեցուն ուղղված հարվածները մի նպատակ ունեն՝ թուլացնել ազգի հոգևոր միաբանությունը, միասնությունը։ Ազգն ուժեղ է իր միաբանությամբ, իսկ հայ ժողովրդի հոգևորությունը, իր եկեղեցու նկատմամբ սերն ամուր է, և, ազգը թուլացնելու համար, ինչպես դա արվել է դարերի ընթացքում, փորձում են թուլացնել եկեղեցին, նրա հոգևոր ուժը»,- ասել է Հայ Եկեղեցու առաջնորդը։ Նրա խոսքով, երկրին հզոր հոգևոր կյանք է անհրաժեշտ, հզոր եկեղեցի, ինչը նշանակում է ժողովրդի հսկայական հավատք, ամուր հոգևոր կյանք։
«Մեր զավակները մեղք չունեն, որովհետև առանձին անհատներ՝ քաղաքական նպատակներից առաջնորդված, կամ պատվերներ ունենալով տարբեր ուժերից, տարբեր կառույցներից՝ իրենց գործն են կատարում՝ շփոթության մեջ գցելով մեր բարեպաշտ զավակներին»,- նշել է Ամենայն Հայոց Կաթողիկոսը:
Նա նշել ՝, որ Եկեղեցու թերությունը, հնարավոր է, այն է, որ լիարժեք չի ներկայացնում իր աշխատանքը, գործունեությունը, ծրագրերը, խնդիրներն ու դժվարությունները։
«Մենք փորձում ենք մեր առաքելությունը իրականացնել մեր ժողովրդի զավակաց կրթել դաստիարակել Տեր Քրիստոսի հավատով, նրանց մատուցել Քրիստոսի սուրբ Ավետարանը, բայց կարծում եմ, որ ժամանակի մեջ պիտի այդ անդրադարձումը լինի, որ Եկեղեցին ճիշտ ճանապարհով է առաջնորդվել, որ իր ջանքերը ուղղել է մեր ժողովրդի հոգևոր կյանքի զորացմանը, մեր զավակների քրիստոնեական դաստիարակությանը, մեր հայրենիքի զորացման ու շենացման գործին և մեղադրանքները, որոնք այսօր որոշակի միտումնավորությամբ ներկայացվում են եկեղեցուն, պիտի անդրադառնան և տեսնեն, որ այդ բոլորը զուրկ են որևէ հիմքից և արդար չեն, որովհետև եկեղեցու դեմ հարվածները հետապնդում են տկարացնելու ազգի հոգևոր միասնականությունը»,- նշել է Գարեգին Երկրորդը:
Նա նշել է նաև, որ Եկեղեցին պետք է դրսևորի իր սերն ու բարյացակամությունը, անկախ իր նկատմամբ ցուցաբերվող վերաբերմունքից։
«Մենք լավատես ենք, մենք վստահություն ունենք առ Աստված, որ տերը իր ձեռքերի մեջ է պահում իրեն հավատացող և իրեն հավատարիմ հայ ժողովրդին, որ բոլոր նման փորձությունները, բոլոր նման նենգ գործողություները պիտի տապալվեն և արդյունք չպիտի տան և մեր ժողովրդի զավակունք միշտ պիտի լինեն հակված իրենց սուրբ եկեղեցուն»:--0-
