Վերջին 20 տարիների ընթացքում կտրուկ նվազած ամուսնությունների վիճակագրության մեջ դրական դինամիկա է նկատվում, ուրբաթ լրագրողներին ասաց ՀՀ ազգային վիճակագրական ծառայության (ԱՎԾ) ժողովրդագրության և մարդահամարի բաժնի պետ Կարինե Կույումջյանը։
«90-ական թվականներից հետո կտրուկ նվազել է գրանցված ամուսնությունների թիվը, մասնավորապես 1995թ.-ին ողջ Հայաստանի տարածքում գրանցվել է ընդամենը 15911 ամուսնություն»,- ասաց նա։
Ըստ նրա, 1980թ.-ին Հայաստանում ավելի քան 32 հազար ամուսնություն է գրանցվել, իսկ արդեն 1990թ.-ին նրանց թիվը 28 հազար է կազմել։
Ինչպես հայտնեց Կույումջյանը, ամենացածր ցուցանիշը հասել է 2000թ.-ին, երբ իրենց հարաբերություններն օրինականացրել է 10988 քաղաքացի։
«Արդեն 2000թ.-ից հետո գրանցված ամուսնությունների թիվն աստիճանաբար սկսել է աճել, իսկ 2010թ.-ին գերազանցել է 17984-ը»,- ասաց նա։
Ըստ նրա, միաժամանակ զգալիորեն կրճատվել են ամուսնալուծությունների դեպքերը։ Այսպիսով, 2010թ.-ին 10988 ընտանեկան զույգերից շուրջ 3 հազարն ամուսնալուծվել է։
Կույումջյանը տեղեկացրեց, որ միաժամանակ ամուսնացած կանանց միջին տարիքը երեք տարով ավելացել է։ Եթե 1994թ.-ին կանայք ամուսնանում էին 22 տարեկանում, ապա այժմ հարսի միջին տարիքը կազմում է մոտավորապես 25 տարեկան։
Հայ փեսաների միջին տարիքը նույնպես ավելացել է 2 տարով՝ մինչև 27-29 տարեկան։
Ըստ ՀՀ ազգային վիճակագրական ծառայության տվյալների, 2011թ.-ի հունվար-մարտ ամիսներին գրանցված ամուսնությունների թիվը կազմել է 4604, ինչը 3,9 տոկոսով շատ է 2010թ.-ի նույն ժամանակահատվածի ցուցանիշից։
Միաժամանակ հաշվետու ժամանակահատվածում ամուսնալուծությունների թիվը կազմել է 776, ինչը 9,4 տոկոսով բարձր է 2010թ.-ի հունվար-մարտ ամիսների ցուցանիշից։ -0-
