Պլասիդո Դոմինգոյին մեղադրել են սեռական ոտնձգությունների մեջ

ԵՐԵՎԱՆ, 13 օգոստոսի. /Նովոստի–Արմենիա/. Ինը կին պնդում են, որ սեռական ոտնձգությունների են ենթարկվել իսպանացի տենոր Պլասիդո Դոմինգոյի կողմից, հայտնում է ՏԱՍՍ–ը` հղում անելով Associated Press–ին։

Ինչպես նշում է պարբերականը, ութ երգչուհի և մի պարուհի պատմել են լրագրողներին, որ 1980–ականների վերջից տարբեր ժամանակ մոտ 30 տարիների ընթացքում Դոմինգոյի կողմից ոտնձգությունների են ենթարկվել։ Կանանցից երեքն ասել են, թե Դոմինգոն փորձել է նրանց համբուրել։ Գործակալության զրուցակիցներից մեկը պնդում է, որ երգիչը ձեռքը տարել է նրա կիսաշրջազգեստի տակ։ Նշված դեպքերն իբր կատարվել են նաև ԱՄՆ–ի տարածքում։

Ինչպես նշում է AP–ը, ինը կանանցից մեկը համաձայնել է, որ իր անունը հրապարակվի։ Դա երգչուհի Պատրիցիա Վուլֆն է, նա ելույթ է ունեցել Դոմինգոյի հետ Վաշինգտոնում։ Ինը զրուցակիցներից յոթը կարծում են, որ իրենց կարիերան տուժել է այն պատճառով, որ իրենք մերժել է Դոմինգոյին։

Գործակալության տվյալներով, ևս մի քանի կին հայտնել է, որ անհանգստություն է զգացել Դոմինգոյի մշտական ոտնձգությունների պատճառով։

AP–ն ընդգծում է, որ երաժիշտների, երգիչների, պարողների և բեմական աշխատողների շրջանում մոտ 30 հարցվածներ ասել են, որ Դոմինգոն իրենց ներկայությամբ ակնհայտ հետաքրքրվածություն է դրսևորել երիտասարդ կանանց նկատմամբ և երբեմն իրեն անպարկեշտ է պահել։

AP–ի կողմից ներկայացված 78–ամյա Դոմինգոյի հայտարարությունում նշվում է, որ «30 տարվա վաղեմության մեղադրանքներն անհայտ անձանց կողմից տխրեցնում են»։ Երգիչն ասել է, որ գործակալության ներկայացրած պնդումները չեն համապատասխանում իրականությանը։ Դոմինգոն ավելացրել է, որ հարաբերությունների մեջ է մտել միայն երկկողմ համաձայնությամբ։ -0-