Մինչև մայիսի 10-ը Մոսկվայից Հայաստան չվերթ չի նախատեսվում․ ՌԴ-ում ՀՀ դեսպանություն
ԵՐԵՎԱՆ, 2 մայիսի․ /Նովոստի-Արմենիա/․ Մինչև ս/թ․ մայիսի 10-ը Մոսկվայից դեպի Հայաստան չվերթ չի նախատեսվում։ Այս մասին ասվում է ՌԴ-ում ՀՀ դեսպանության Facebook-յան էջում՝ ի պատասխան վերջին օրերին քաղաքացիներից ստացված ավելի քան երեք հազ․ հարցումների։
Հաղորդագրության մեջ նշվում է, որ հնարավոր չվերթի կազմակերպման աշխատանքները կրում են շարունակական բնույթ և ժամկետի վերաբերյալ առավել հստակ տեղեկատվություն ստանալուն պես դեսպանությունը կհայտնի։
«Պատասխանելով նաև քաղաքացիների կողմից բարձրաձայնվող բնակարանային վարձավճարների տրամադրման/փոխհատուցման վերաբերյալ հարցերին՝ նշենք, որ դեսպանությունը ցանկացած աջակցության տրամադրման հարցում ելնում է առկա հնարավորություններից, մինչդեռ նման օժանդակության տրամադրումը, ցավոք, այդ հնարավորությունների շրջանակից դուրս է»,- ասվում է դեսպանության գրառման մեջ։
Դեսպանությունը խնդրել է ըմբռնումով մոտենալ ստեղծված իրավիճակին։-0-
