Ժամանակավորապես դադարեցվում է ԻԻՀ–ում ՀՀ դեսպանատան հյուպատոսական բաժնի աշխատանքը

ԵՐԵՎԱՆ, 23 փետրվարի․ /Նովոստի-Արմենիա/․ Իրանում Հայաստանի դեսպանությունը ժամանակավորապես դադարեցնում է հյուպատոսական բաժնի աշխատանքը։

Ըստ դեսպանության Facebook-յան էջում կատարված գրառման՝ Իրանի Իսլամական Հանրապետությունում Հայաստանի Հանրապետության դեսպանությունը սկսած 2020 թ. փետրվարի 23-ից ժամանակավորապես դադարեցվում է հյուպատոսական բաժնի աշխատանքը՝ քաղաքացիների հերթագրումը և ընդունելությունը:

«Դեսպանությունը հայցում է քաղաքացիների ներողամտությունը պատճառված անհարմարությունների համար: Հյուպատոսական բաժնի աշխատանքի վերսկսման վերաբերյալ ՀՀ դեսպանությունը լրացուցիչ կտեղեկացնի»,- ասվում է գրառման մեջ։

Նշենք, որ Իրանում կորոնավիրուսով վարակի առաջին դեպքը գրանցվել է փետրվարի 19–ին։ Այսօրվա դրությամբ Իրանում կորոնավիրուսից մահացել է 5 մարդ։ Իրանում 2019-nCoV տիպի կորոնավիրուս է ախտորոշվել 28 մարդու մոտ։ Այսօր Facebook–ի հայկական հատվածում ակտիվորեն քննարկվում էր հայ–իրանական սահմանը փակելու անհրաժեշտությունը գոնե Նովրուզ Բայրամի ժամանակահատվածում, որը բազմաթիվ իրանցիներ նախընտրում են տոնել Երևանում։-0-