ԵՐԵՎԱՆ, 8 հունիսի. /Նովոստի-Արմենիա/. Սննդային թունավորումը սուր հիվանդություն է, որը սովորաբար ուղեկցվում է օրգանիզմում սննդամթերքի հետ հայտնված տարբեր միկրոօրգանիզմների, ամենից հաճախ` մանրէների հետևանքով մարսողության խանգարմամբ։ Այդ խնդիրն արդիական է դառնում հատկապես ամռանը, երբ մթերքի պատրաստման և պահպանման պայմանների խախտման հետևանքով դրանք արագ են փչանում, ինչը դառնում է աղիքային խանգարումների պատճառ։
Թե ինչպես խուսափել դրանից, «Նովոստի–Արմենիա» գործակալությանը պատմել է Հայաստանի Առողջապահության նախարարությանը կից առողջապահության պետական տեսչության հիգիենայի բաժնի վարիչ Մարգարիտա Բաբայանը։
Ըստ նրա, թունավորումների մեծ մասի պատճառը ոսկեգույն ստաֆիլոկոկի և աղիքային ցուպիկի բազմացումն է սննդամթերքում։ Թունավորումներն ամենից հաճախ առաջանում են ժամկետանց մթերքի, ինչպես նաև սխալ պայմաններում կամ սանիտարական նորմերի խախտումներով պատրաստված մթերքի օգտագործումից։
Այս տարվա առաջին հինգ ամիսներին արդեն գրանցվել են բոտուլիզմի դեպքոր, սնկային թունավորումներ, ինչպես նաև ստաֆիլոկոկային սննդային թունավորումներ։
Ամառ` պիկնիկներ և... թունավորումներ
Մասնագետը խորհուրդ է տալիս բնության գրկում հանգստի բոլոր սիրահարներին վերցնել սառնարան–պայուսակ` մթերքը պահելու համար։
Բացի այդ, նա խորհուրդ չի տալիս պահել պատրաստված խորովածը մի քանի օր։ Ցանկալի չէ նաև լվանալ ձեռքերը գետում, և, առավել ևս, այդ ջրում լվանալ մրգերը, բանջարեղենը և ամանեղենը։ Խորհուրդ չի տրվում նաև ուտելիքի հետ խմել քաղցր գազավորված ըմպելիքներ, քանի որ դա կարող է հանգեցնել ստամոքսի խանգարման։
Ամեն դեպքում, ինչպես նշեց փորձագետը, կարելի է հանգստի վերցնել կաթնաթթվային մթերք` մածուն և հանքային ջուր, բայց այդ ամենը պետք է պահվի սառնարան–պայուսակում։
Սունկ` օգու՞տ, թե՞ վնաս
Թունավորման պատճառ հաճախ կարող է դառնալ հավաքած սունկը, որից կերակուր է պատրաստվել։ Առավել հաճախ թունավորվում են այն սնկերից, որոնք արտաքին տեսքով նման են ոչ թունավոր սնկերի, բայց դրանք թունավոր են։
Բաբայանը զգուշացնում է, որ ամենից հաճախ սնկային թունավորումներից տուժում են երեխաները։
Նրանք հաճախ են գնում անտառ` սունկ հավաքելու, պատրաստում են խարույկի վրա, ուտում են և թունավորվում։ Այդ իսկ պատճառով բժիշկը խորհուրդ է տալիս ծնողներին թույլ չտալ երեխաներին օգտագործել սունկը սննդի մեջ` առանց մեծահասակների իրազեկության։
Եթե, այնուամենայնիվ, թունավորվել եք
Փորձագետը խորհուրդ չի տալիս զբաղվել ինքնաբուժությամբ` սունկ ուտելուց հետո սրտխառնոցի կամ փսխման դռպքում անհրաժեշտ է միանգամից դիմել բժիշկի։
Загружается новость ...
"Право"
Իսկ ստաֆիլիկոկային թունավորման, սալմոնելյոզի և դիզենտերեայի դեպքում ստամոքսի լվացում կատարել, ակտիվացված ածուխ խմել և շատ հեղուկ օգտագործել։ Անպայման բժիշկ կանչել։
Ստաֆիլոկոկային սննդային թունավորումը փսխմամբ և փորլուծությամբ ուղեկցվող սուր համախտանիշ է, որի հարուցիչը ստաֆիլոկոկային էնտերոտոքսինով թունավորված սնունդն է։
Նման թունավորումների պատճառ կարող է դառնալ հիգիենայի կանոնների խախտումը։
Հիգիենան ամենից առաջ` մասնագետի խորհուրդները
- Ամռան տապին սննդային թունավորումներից խուսափելու համար պետք է լավ և մի քանի անգամ լվանալ ձեռքերը, մրգերը, բանջարեղենը, կանաչին։
- Ուշադիր լինել խանութներից պատրաստի աղցանների գնման ժամանակ, սառնարանում չպահել մայոնեզով կամ թթվասերով աղցանները վեց ժամից ավելի, դրանց մայոնեզ և թթվասեր ավելացնել միայն մատուցելուց առաջ։ Կերակրատեսակները դնել սառնարան դրանց պատրաստումից երկու ժամվա ընթացքում։
- Հիշել իրենց մեջ թունավորման սպառնալիք պարունակող մթերքների մասին։ Դրանք, նախևառաջ, արագ փչացող մթերքներն են` կաթ, թթվասեր, կրեմով խմորեղեն, ինչպես նաև մսով ուտելիքներ, շաուրմա, լահմաջո։
Փողոցներում վաճառվող փափուկ լցնովի պաղպաղակը նույնպես ռիսկային է։ Այստեղ կարևոր է հետևել այն սարքին, որում պատրաստվում է այդ պաղպաղակը։ Այն պետք է լավ լվացվի և մանրէազերծվի պաղպաղակի յուրաքանչյուր նոր խմբաքանակի պատրաստումից առաջ։
- Զերծ մնալ պահածոյացումից, որը կարող է բոտուլիզմի պատճառ դառնալ։ Ամենից անվտանգ են մթերքների պահման մյուս տարբերակները` սառեցումը, աղ դնելը կամ չորացնելը։
Եղեք ուշադիր ձեր օգտագործած սննդի նկատմամբ և կխուսափեք թունավորման տհաճ դրսևորումներից։ -0-